Otru misteriu na política asturiana: de participar nun videoclip feminista n'asturianu a calificar al idioma de "inventu"

Carolina López, candidata de VOX, participó como figurante na grabación de 'La mesma revolución' de Silvia Quesada.

"Lo qu’hai n’Asturies son bables", "hai tantos bables como conceyos” y "la llingua ye un inventu" foron dalgunes de les frases que dexó pal recuerdu la ex conceyala en Tinéu nel alderique eleutoral del miércoles en RTPA. Sicasí va poco más de cuatro años apecía nel videoclip d'esti cantar de la so paisana, una de les figures más destacaes de la música asturiana en llingua asturiana, lo que se conoció depués de difundise delles captures del mesmu en redes sociales.

La candidata sal en dos ocasiones nel videu, asoleyáu'l 7 de marzu del 2019, na viéspora del Día Internacional de la Muyer. Na primera, nel minutu 2.22 'canta' la frase "nesti mundu" y, na segunda, nel 3.20, apaez sonriente faciendo un movimientu de cabeza.

Con lletra d'Alfredo González, 'La mesma revolución' preséntase como una "canción feminista de corte pop, pensada pa remover conciencies al tiempu que les tiestes y los pies". Precisamente, el partíu de López ye ún de los más críticos col feminismu.