"Agora resulta qu'unos universitarios van dicir a los asturianos más mayores cómo tienen que falar", diz Carolina López

Ésta foi la respuesta de la vocera de VOX a una referencia de la viceconseyera Gutiérrez al "consensu na universidá a la hora de falar de la llingua asturiana precisamente como llingua".

Carolina López Fernández, la diputada que salió nel videoclip del cantar feminista n'asturianu 'La mesma revolución' de Silvia Quesada, sigue la mesma llinia que marca so partíu pa col idioma. Nel so turnu de la comparecencia d'Ana Vanessa Gutiérrez, responsable de Cultura, Política Llingüística y Turismu, na Comisión de Presidencia, Retu Demográficu, Igualdá y Turismu a pidimientu de Foro y el PP, principió falando d'imposición pol fechu de que la viceconseyera emplegase la llingua asturiana nes sos intervenciones y apuntó, en castellanu, que "yo soi de Tinéu y puedo asegura-y que conozo a munchísimos tinetenses que falen bable y tamién-y aseguro que nengún d'ellos fala como vusté s'espresó vusté equí. A min costóme muncho entendela y en munchos casos nun-y entendí".

Depués de delles entregues, insistió apuntando que "vustedes confunden lo que ye la llingua colos bables, colo que sí se fala y ésa ye la diferencia" y entrugó a Gutiérrez si "cree que se fala igual nel occidente que nel oriente, que nel centru. ¿Fálase igual en tolos conceyos?".

Gutiérrez señaló nesi momentu qu'esi alderique "en tou casu debería ser científicu y producise n'otros espacios, como pue ser la universidá, y ye un debate que nun esiste". "Hai un consensu a la hora de falar de la llingua asturiana precisamente como llingua, colo cual nun me paez que sía mui responsable pela nuestra parte cuestionar a la comunidá científica y especializada. Al menos a min nunca se m'ocurriría facelo, pero nin nesto nin en nenguna otra materia", añadió.

"Agora resulta qu'unos universitarios van dicir a los asturianos más mayores cómo tienen que falar, cómo tienen que dirixise", foi la sorprendente respuesta de López Fernández a les pallabres de Gutiérrez, que tuvo pallabres d'apoyu por parte de la socialista Noelia Macías, con ironía, y de Xabel Vegas, de Convocatoria por Asturies, qu'amosó la so "indignación" pola "falta de respetu a la señora compareciente y la inorancia manifiesta de la señora portavoz de VOX a la hora de falar de la llingua asturiana".

Na semeya, Carolina López.