“Nun ye tiempu de reproches, sinón de xuntura y d’una acción coordinada”, reclama González Riaño

Unidá, tresversalidá ideolóxica y enanchamientu de la base social de demanda de la oficialidá. Son les trés cuestiones sobre les que Xosé Antón González Riaño, presidente de l’Academia de la Llingua Asturiana (ALLA), considera qu’hai que trabayar agora cola seguranza de que “el resultáu del procesu namái ye un retrasu nel llogru de los derechos llingüísticos”, como apuntó nel XLIII Día de les Lletres Asturianes.

“Amigues y amigos, nun se llogró la oficialidá. Sabemos lo qu’ello representa de sensación de fracasu y de perda d’una oportunidá hestórica. Pero ello nun pue xenerar, de nengún xeitu, una frustración que lleve al desánimu coleutivu y a la desmovilización. La vindicación de los nuesos derechos llingüísticos sigue ehí, como una esixencia democrática irrenunciable y va consiguise más ceo que tarde”, principió la parte del discursu institucional más esperada pol públicu del Teatru Filarmónica y de los espectadores de TPA que taben siguiendo l’actu académicu en direuto.

Ente los presentes, un añu más, el presidente Adrián Barbón, y un bon númberu de parllamentarios, ente ellos dalgunos de los participantes nes negociaciones a cuatro bandes sobre la reforma del Estatutu d’Autonomía, como la socialista Noelia Macías; Rafael Palacios, Sofía Fernández Castañón y Daniel Ripa, de Podemos; y Adrián Pumares, de Foro. Por Izquierda Xunida (IX) nun hebo representación de nengún de los dos diputaos na Xunta Xeneral, siendo la cabeza visible nel actu, Víctor Suárez, responsable de Política Llingüística de la coalición qu’acudiera tamién a los alcuentros de xineru.

Tamién tuvieron nel Filarmónica Álvaro Queipo, secretariu xeneral del Partido Popular (PP) y diputáu; Luis Armando Fernández Bartolomé, ex de Ciudadanos que caltién el so escañu; y les socialistes Mónica Ronderos y Celia Fernández, vicepresidenta de la Xunta Xeneral. A ellos hai que sumar les conseyeres de Cultura, Política Llingüística y Turismu, Berta Piñán, y Educación, Lydia Espina; el direutor xeneral de Política Llingüísta, Antón García, y el d’Infraestructures Rurales y Montes, Fernando Prendes; Roberto Morís y María Fernández Álvarez, diputáu nel Congresu y senadora socialista; los alcaldes de Colunga, Bimenes y El Franco; el conceyal de Cultura d’Uviéu, José Luis Costillas; y l’ex presidente Antonio Trevín, amás de numberosos represententanes del mundu cultural asturianu.

Cumplimientu del artículu 3.2 de la Constitución

González Riaño siguió la so intervención faciendo autocrítica “porque, meyor que falar de culpabilidaes, habríemos referinos a ámbitos de responsabilidá nel resultáu de les negociaciones al rodiu de la oficialidá”, asitiándolos nes fuercies polítiques, nel asturianismu y na propia ALLA. “Asina, paez claro que dalgunes de les formaciones polítiques que participaron nel procesu nun supieron dir más allá de les sos llexítimes estratexes partidistes; mentanto que l’asturianismu nun supo enllaciar, dende una perspeutiva temporal amplia, coles bases programátiques de los grupos negociadores. L’Academia, en fin, magar el so esfuerzu y el diálogu permanente colos actores, nun foi a tresmitir la trescendencia de la oportunidá que, llueu de décades, teníemos énte nós”, analizó.

“En cualquier casu, l’Academia acueye’l resultáu del procesu siguíu con serenidá democrática y na seguranza de que namái ye un retrasu nel llogru de los derechos llingüísticos del pueblu asturianu. La estratexa pasa agora per afondar na vindicación, como un derechu irrenunciable, del cumplimientu del artículu 3.2. de la Constitución Española”, afirmó’l presidente de la institución, qu’encamentó a tener en cuenta trés cuestiones básiques: unidá “de toles instancies qu’hasta güei trabayaron pol algame de los nuesos derechos llingüísticos” porque “nun ye tiempu de reproches, sinón de xuntura y d’una acción coordinada”; tresversalidá ideolóxica, yá que “la vindicación de la llingua asturiana nun pertenez, n’esclusiva, a nenguna opción política o ideolóxica”; y enanchamientu de la base social de demanda de la oficialidá.

Tamién miró a mayu del 2023, fecha na que va haber eleiciones a la Xunta Xeneral, que calificó de “trescendentes”. “Ehí, los partíos políticos y la ciudadanía tendrán el so papel a la hora de plantegar y, nel so casu, sofitar, les propuestes en política llingüística, incluyendo la oficialidá, qu’Asturies demanda y necesita”, finó pa depués lleer unos versos del poeta Lluis Fontetoba.

“Dos persones d’un valir esceicional”

L’actu institucional del XLIII Día de les Lletres Asturianes, que volvía al Filarmónica 10 años depués, abriólu Xuacu Amieva a la gaita. Sonia Avellaneda presentó l’actu recuperando como compañeru de ceremonies a Próspero Morán, pareya que dio pasu a Xosé Ramón Iglesias Cueva, secretariu de l’ALLA, que s’encargó de lleer les actes de la xunta estraordinaria d’abril na que se decidió nomar a Inaciu Galán académicu de númberu y a Lisardo Lombardía académicu d’honor.

González Riaño, llueu de poner los espetos conmeorativos a los miembros nuevos y de sentir los discursos d’éstos, fixo l’institucional, que principió recordando que “los efeutos de la pandemia, magar qu’amenorgaos, siguen ehí”, polo que la institución apostó por “un actu cenciellu, anque col altor formal qu’un Día de les Lletres Asturianes merez”. Asina, celebróse baxo un protocolu d'invitaciones confirmaes y numberaes, lo que torgó que se completase l’aforu del Filarmónica.

 “Güei ye una xornada de fonda allegría pa la institución que presido. Y asina ye porque acoyemos nella a dos persones d’un valir esceicional”, que fixeron “méritos bultables” pa recibir esti honor. De Lombardía dixo que “ye una figura clave ya irrepetible nel resurdir de la música tradicional asturiana, de la cultura popular y de la llingua asturiana. Asturies nun sedría güei a entendese culturalmente ensin la so aportación fundamental dende la transición política y a lo llargo de los caberos cuarenta años”.

Por eso pidió-y “que siga con esi mesmu enfotu y que seya’l meyor embaxador d’Asturies y de l’Academia p’afitar y tresmitir esos llogros perdayuri. Munches gracies, Lisardo, pol llabor y por asitiate ente nós”.

De Galán apuntó que “axunta na so persona unos méritos y unes capacidaes de trabayu ablucantes como periodista, como escritor, como entamador de xeres culturales…, y como activista. Sí, como activista, porque Asturies necesita d’un activismu intelixente y empobináu al llogru de los derechos civiles y llingüísticos qu’otres comunidaes algamaron cuantayá y que, sorprendentemente, equí se nos resisten”.

Darréu solicitó-y que “sofite la capacidá de proyeición social de l’Academia, el so puxu comunicativu y les dinámiques d’interrellación institucional a tolos niveles. Nun ye poco, pero sabrá facelo ensin dulda y, por ello, dámos-y les gracies yá dende esta mesma acoyida ente nós”.

Recuerdu a Xosé Bolado y Urbano Rodríguez

Nun faltó nel so discursu’l recuerdu a Xosé Bolado y Urbano Rodríguez, “dous académicos de númaro tan importantes y fundamentales pral proceso de recuperación llingüística en Asturias como os que nos deixaron el pasao ano”. “Ellos tuveron en todo, dende el empezo, con úa xenerosidá y un bon fer, respectivamente, nos ámbitos lliterario y educativo, que nós nun vamos esqueicer y qu’as xeneracióis d’hoi haberían entender como a mayor mostra del compromiso dafeito con Asturias, a súa llingua y cultura. Bolado y Urbano siguen vivos na nosa acordanza y nós vamos siguir mantendo con puxo as súas concepcióis y aportacióis al proceso de recuperación á qu’ellos tanto contribuiron”, espresó.

El repás al llabor académicu, como ye vezu, tamién ocupó parte de la so intervención, mui aplaudida polos presentes. L’actu siguió cola llectura de poemes del númberu 38 de ‘Lliteratura’, dedicáu a Bolado, por parte d’Avellaneda y Morán, y con un conciertu de Misiva.

La banda de punk-rock moscona presentóse nun formatu semiacústicu col refuerzu de Toni Tamargo pa interpretar ‘Muries de soledá’, ‘Pexes inertes’, ‘Aquellos guaḥes’, ‘La cárcel’, ‘Esclavos del momentu’ y ‘Foriatu na mio ciudá’. “Pidímosvos que vos pongáis d’alcuerdu, que nun dexéis pasar esta oportunidá histórica”, dirixóse’l cantante Humberto Sierra a los políticos presentes na despedida enantes de tocar l’últimu cantar, arrincando los aplausos d’un públicu que terminó l’actu de pie cantando l’himnu del país col acompañamientu a la gaita de Xuacu Amieva y glayando “oficialidá”.

Na semeya superior, un momentu del discursu de González Riaño con Lombardía y Galán sentaos entre la ex presidenta de la institución, Ana María Cano, y la siella vacía.