L’ALLA recibe a Galán y a Lombardía nel Teatru Filarmónica nel XLIII Día de les Lletres Asturianes

Diez años depués torna al Teatru Filarmónica l’actu institucional pol Día de les Lletres Asturianes, nel que l’Academia de la Llingua Asturiana (ALLA) va recibir a Inaciu Galán y a Lisardo Lombardía como académicos de númberu y honoríficu. Na xornada les llibreríes dan un 10 por cientu de descuentu na merca de llibros y discos n’asturianu.

Al meudía per tercer añu, y cola presencia de les cámares de TPA, que va emitir en direutu l’eventu, va principiar n’Uviéu l’actu pol XLIII Día de les Lletres Asturianes, col Filarmónica nesta ocasión como sede. Va poner l’entamu musical Xuacu Amieva, pa dar pasu depués a la xunta estraordinaria de l’ALLA y l’acoyida de los académicos nuevos, el periodista, escritor y doctor pola Universidá d’Uviéu con una tesis sobre la llingua asturiana nel franquismu, Inaciu Galán, como académicu de númberu, y el médicu y xestor cultural Lisardo Lombardía, como académicu honoríficu.

El siempre esperáu discursu institucional del presidente de la institución, Xosé Antón González Riaño, va dar continuidá al actu, que va finar con una llectura de poemes del númberu últimu de la revista ‘Lliteratura’, el 38, dedicada a Xosé Bolado, y una actuación musical del grupu de punk-rock Misiva. Un añu más, el presidente del país, Adrián Barbón, va tar presente nesti actu central del Día de les Lletres Asturianu, que se celebra baxo un protocolu d'invitaciones confirmaes y numberaes, una cita a la que tamién confirmó la so asistencia’l rector de la Universidá d’Uviéu, Ignacio Villaverde.

Día del Llibru Asturianu

Nesta xornada de celebración de la nuesa lliteratura, la Conseyería de Cultura, Política Llingüística y Turismu celebra’l Día del Llibru Asturianu. Les llibreríes del país ufren un 10 por cientu de descuentu na merca de llibros o discos y n’asturianu, oportunidá tamién pa recibir de baldre los llibros conmemorativos d’esta Selmana de les Lletres Asturianes, dedicada al músicu y dibuxante Ígor Medio: ‘Ígor medio. El carbón y l’arena’ y ‘Contos eonaviegos’ –namái en comercios del Eo-Navia y en trés d’Uviéu–.

Les llibreríes participantes son Aldaba Regalos, Aldebarán, Antares, El Búho Lector, Casa del Libro (tamién en gallego-asturiano), Cervantes (tamién en gallego-asturiano), Chemi, Diocesana, Elías, Esfera, Garluc, Hangar Rebelde, Maribel, Pasa Página, Pintar-Pintar, Polledo, Puntos, Reconquista, San Pablo, II Milenio y Trabe (tamién en gallego-asturiano), n’Uviéu; Acuarel, De Bolsillo, La Buena Letra, Central, Clarín, 4 Letras, La Habitación Propia, Identidad Secreta, Paradiso, La Revoltosa, Roy y Mundo Sonoro, en Xixón; Casona, Clarín, Noveno Arte, Víctor Núñez y Elepé Producciones, n’Avilés; Disco 55, La Llocura, La Pilarica y La Torre, en Mieres; Casa Pérez, Patefa y San Pedro, n’A Veiga; Pablo, en Bual; Treito, en Cangas del Narcea; Alfonso, n’El Franco; Las Dos Vías, en Grau; Muséu de la Sidra, en Nava; La Semeya, en Noreña; Gestión, en Parres; Rima, en Piloña; Sol, en Samartín del Rei Aurelio; y Fnac, La Chimenea y Naredo, en Siero.

Amás, Política Llingüística entama l’actu últimu de la Selmana de les Lletres Asturianes esta tarde, la mesa redonda ‘¿En qué andaría Ígor? El cómic asturianu güei’, cola participación de Raquel Lagartos, Ernesto García ‘Neto’ y el propiu Barbero, cola moderación de Chechu García. Va principiar a les 18.30 hores nel xixonés Muséu Barjola, onde ta espuesta l’amuesa ‘Xente llano de Xixón. La obra gráfica d’Ígor Medio’, con entrada llibre.

Na semeya, la entós presidenta Ana María Cano y los académicos, nel actu institucional del XXXIII Día de les Lletres Asturianes celebráu nel 2012 nel Filarmónica.