"Nun nos punximos d'alcuerdu" nel nome de la ría del Eo, coinciden Barbón y Rueda

Galicia denunció la oficialización del topónimu tradicional de la ría n'Asturies al Tribunal Superior de Xusticia de Madrid llueu del refugu del ministeriu al recursu presentáu.

"Nun lo falamos", confirmó Adrián Barbón, presidente d'Asturies na ronda d'entrugues llueu del 'Alcuentru Billateral sobre'l Retu Demográficu Asturies-Galicia', celebráu baxo'l lema 'Avanzar xuntos', al ser los dos mandatarios entrugaos pol si hai entendimientu no que respeuta al nome de la ría del Eo dientro de la bona sintomía amosada na xornada pol socialista y el popular. "Ehí nun nos punximos d'alcuerdu", siguió Alfonso Rueda nun ambiente distendíu, a lo qu'asintió'l llavianés con un "hai que reconocelo abiertamente".

Pero lo cierto ye que Galicia nun da'l so brazu a torcer nel so oxetivu de que namái'l nome de 'ría de Ribadeo' sía oficial y non doble como dende payares, cuando l’Instituto Geográfico Nacional (IGN) ratificó’l topónimu ‘ría del Eo’ como alternativu “col mesmu nivel d’oficialidá y usu”. Hasta'l puntu de xudicializar l'asuntu.

Asina, depués de qu'en xineru la Subsecretaría de Tresportes, Movilidá y Axenda Urbana desestimara'l recursu presentáu, esti mes la Xunta anunció la presentación d'un recursu contencioso-alministrativu énte'l Tribunal Superior de Xusticia de Madrid contra la resolución del IGN.

Na semeya, Rueda y Barbón.