Asturies y Galicia roblen la Declaración de Taramundi

Los dos países constitúin un grupu de trabayu permanente pa intercambiar esperiencies sobre'l retu demográficu, emigración, derechos sociales y desarrollu rural.

El presidente asturianu Adrián Barbón y el gallegu Alfonso Rueda roblaron esta mañana la Declaración de Taramundi llueu del 'Alcuentru Billateral sobre'l Retu Demográficu Asturies-Galicia', celebráu baxo'l lema 'Avanzar xuntos', que tuvo llugar nel Hotel La Rectoral d'esti llugar del occidente. Nel testu alcuerden collaborar y "texer alliances" p'afrontar los desafíos que van enfrentar les dos autonomíes nos años próximos, y reflexa'l compromisu d'entrambos gobiernos para reforzar los llazos de xunión y compartir bones práutiques n'ámbitos d'especial importancia.

Son cuatro les estayes de trabayu nos que se va poner el focu nun primer momentu pa intercambiar esperiencies. Trátense de gobernanza del retu demográficu, marco normativo y planificación; emigración, inmigración y retornu; derechos sociales, bienestar y apoyu a la natalidá y a la conciliación; y innovación y desendolcu rural.

El documentu recueye un pidimientu al Gobiernu estatal pa qu'esixa a la Xunión Europea la modificación del criteriu pa reconocer territorios escasamente poblaos, de manera que tenga en cuenta aspeutos "fundamentales" como l'avieyamientu, la dispersión poblacional o la natalidá baxa. Esti cambio permitiría que más zones d'Estáu accedieran a les midíes d'apoyu específicu diseñaes poles instituciones europees.

Tanto Asturies como Galicia coinciden en que la revisión de la fiscalidá y l'establecimientu de beneficios o incentivos pa la población rural han formar parte del abanicu d'actuaciones orientaes a garantizar la cohesión territorial. Igualmente, defenden el fomentu d'actividaes nueves nel mediu rural, la diversificación de la estructura económica y una especial atención a las aldees como estructura territorial singular y con estensa implantación nos dos países.

Nel puntu últimu de la declaración defínense como aliaos prioritarios pero non esclusivos, polo que se manifiesten abiertos a qu'otros territorios se sumen a esti formatu d'alcuentros, "tamién a universidaes, organismos o entidaes que compartan la nuesa voluntá d'ufrir respuestes a l'axenda qu'enfrentamos".

Na semeya, Barbón y la delegación asturiana conformada por Juan Cofiño, vicepresidente y conseyeru d'Alministración Autonómica, Mediu Ambiente y Cambiu Climáticu; Melania Álvarez, conseyera de Servicios Sociales y Bienestar; Alejandro Calvo, conseyeru de Medio Rural y Cohesión Territorial; María del Mar García, direutora xeneral de Finances y Economía; y el comisionáu pal Retu Demográficu, Jaime Izquierdo, atentos a una intervención de Rueda.