L’Instituto Geográfico Nacional confirma’l topónimu ‘ría del Eo’ como oficial al mesmu nivel que ‘ría de Ribadeo’

Cumpliéronse les previsiones de la Direición Xeneral de Política Llingüística y l’Instituto Geográfico Nacional (IGN) ratificó’l topónimu ‘ría del Eo’ como alternativu al de ‘ría de Ribadeo’ –únicu reconocíu a nivel estatal– “col mesmu nivel d’oficialidá y usu”. Yá lo fixera va un añu, pero la resolución anulóse por un defeutu de forma agora correxíu.

L’organismu dependiente del Ministeriu de Tresportes, Movilidá y Axenda Urbana firmó’l martes la resolución nueva otra vegada nel sentíu demandáu pol Gobiernu d’Asturies, que conoció güei la decisión. Asina, ‘ría del Eo’ pasa a ser tamién oficial, lo que, na práutica, “supondrá la inclusión d’entrambos topónimos en toles bases de datos xeográfiques y cartográfiques producíes poles alministraciones públiques integraes nel Sistema Cartográfico Nacional”, espliquen dende l’Executivu.

“La resolución del IGN señala que se constató que la denominación ‘ría del Eo’ ye utilizada mayoritariamente nos territorios del marxe asturianu del ríu homónimu, amás de tar recoyida con un nivel d’usu similar a ‘ría de ribadeo’ en cartografía y otros documentos polo menos dende’l sieglu XIX hasta anguaño”, añaden. Dende’l llau gallegu reivindicóse el ‘ría de Ribadeo’ como nome únicu pa esti hidrónimu, refugando la doble denominación, y precisamente un recursu presentáu pola Diputación de Lugo llegó a anular el primer posicionamientu del organismu, nel mesmu sentíu qu’agora, fechu en payares del 2021.

Na imaxe, Castropol, bañada pola ría del Eo, en primer términu, con As Figueiras enfrente. Semeya propiedá del Conceyo de Castropol.