Nel Morán llévanos a un futuru llonxanu nel llibru 'L'aire irrespirable'

Impronta asoleya la novela nueva del autor nacíu en Trubia y residente en Xixón, que va presentar na llibrería La Buena Letra.

Cuatro años depués d'asoleyar 'Na sienda'l destín', Nel Morán espubliza la so cuarta novela, de nome 'L'aire irrespirable'. Esta historia tresllada al llector al sieglu XXXI, un futuru llonxanu, p'atopar "pasaos y presentes tornando una vuelta y otra a facese realidá", apunten dende la editorial.

"Amor, la narradora d’esta novela, cuéntanos cómo se-y vien enriba una vida de sierva que-y va esgonciar dafechu la esistencia", añaden al tiempu qu'adelanten que dientro la propia novela apaez otra "más ablucante tovía". Asina, 'L'aire irrespirable', que se desendolca en trés ciudaes, Xixón, Villaviciosa y una de creación nueva de nome 'Esterna', onde vive'l pueblu trabayador, l'aristocracia y los capitalistes, de manera respeutiva, avéranos a "la imperfeición de la historia, a esa constante repetición de los erros humanos".

La presentación del llibru va tener llugar esta tarde a les 20 hores na llibrería xixonesa La Buena Letra. Morán va tar acompañáu nesti actu pol escritor César Iglesias.