“Sigo la retranca asturiana na mio escritura”, apunta Nel Morán

‘Na sienda’l destín’ ye la tercer novela de Nel Morán depués de la xuvenil ‘Tyan’ (2018) y ‘Fabia’ (2019). “Entra dientro de la manera d’escribir mía, na que sigo la retranca asturiana na escritura”, esplica l’autor sobre un llibru que ye una crítica a les desigualdaes sociales.

Narrada en primera persona, como ye vezu nes sos obres, el protagonista de la historia ye Dani Díaz, mozu “qu’algama’l so primer trabayu, de porteru nun edificiu que tien una emisora de radio na primer planta. Ye una persona d’estudios, que destacaba na universidá con respeuto a los sos compañeros, pero de clase baxa. Nel edificiu atopa a Cuca Antuña, una compañera, de clase alta, que trabaya na radio” al tener padrín, rellata Morán.

“La obra ye una denuncia de dalgo mui actual: la diferencia ente clases sociales. Cómo la xente de cocorocó, como Cuca, ye la que tien accesu a determinaos puestos de trabayu”, añade sobre esta historia contada d’una manera mui entretenida. Nesi sen, apunta que ‘Na sienda’l destín’ “entra dientro de la manera d’escribir mía, na que sigo la retranca asturiana na escritura”.

“Escribo de la forma que s’escribe n’otres lliteratures. Los llibros compiten cola televisión y les series y busco ufrir dalgo áxil qu’enganche al llector. Qu’entre al llibru como si fora la so casa”, sigue’l xixonés nacíu en Trubia nel 1959, qu’en branu finó una coleición de rellatos, un total de 12, y que nesti momentu ta enfotáu n’otra novela.

Entrugáu sobre la evolución d’esta obra con respeuto a les anteriores, Morán apunta que sí la detecta “nel fondu. Cuido que con cada novela toi más fechu como escritor”. Asina, confiesa que “cuando terminé la coleición de rellatos sorprendíme”.

Éstos cuenten cola retranca que tanto carauteriza la so escritura y que convierte ‘Na sienda’l destín’, editáu por Trabe, nún de los títulos del momentu. Morán anima a lleela, pero, sobre manera, a lleer n'asturianu, porque "d'esta mena llograremos conservar la llingua de nós".