Medvédev, rival de Carreño nel pasu previu a la llucha por medaya

El tenista xixonés superó al alemán Koepfer y espera en cuartos al rusu. María López y Raúl Entrerríos celebraron victories esta xornada.

Llega'l momentu de la verdá pa Pablo Carreño. El trunfu de güei n'octavos de final en dos sets, 7-6 y 6-3, nun partíu con munchu calor y humedá, pon a Daniil Medvédev, númberu 2 del ranking ATP, nel so camín hacia les medayes.

Sufrió tamién poles altes temperatures el rusu nel so choque col italianu Fabio Fognini (6-2, 3-6 y 6-2), teniendo que ser atendíu en dos ocasiones nel partíu, lo que lu llevó a responsabilizar d'una posible muerte al xuez de siella y a la organización. Precisamente la compañera en dobles mestos de Carreño, la catalana Paula Badosa, tuvo qu'abandonar la competición por un golpe de calor, polo que la pareya queda eliminada ensin llegar a debutar.

El partíu de cuartos de final ente Carreño y Medvedev va xugase mañana na pista 1 del Parque de Tenis d'Ariake a lo llargo de la xornada que va principiar a les 8 hores (17, hora llocal). Ye más tarde qu'estos díes pa evitar precisamente'l calor.

Bonos resultaos

La seleición española feminina de ḥoquei yerba caltién les sos opciones de clasificar pa cuartos de final al derrotar a Nueva Zelanda, hasta'l momentu colíder del grupu, por 2-1 con tantos d'Iglesias y de Riera. L'equipu capitaniáu por María López ocupa agora la cuarta plaza que da'l pase con 3 puntos, empatada con China, quinta, cola que va xugar mañana'l partíu decisivu a les 11.30 hores (18.30, hora llocal).

Pela so parte, Entrerríos algamó la tercer victoria en trés partíos, a la que collaboró con 4 tantos, y el combináu de balonmanu lidera'l so grupu con 6 puntos a falta del partíu de Francia, rival próximu de los de Jordi Ribera'l vienres a les 7.15 hores (14.15, hora llocal), con Alemaña. España derrotó a Brasil por 32-25 cola mala noticia de la lesión de Morros y les molesties nel hombru izquierdu qu'amosó Dujshebaev nel tramu final del choque.

Na imaxe, Carreño depués de ganar a Dominik Koepfer.