Carreño clasifica pa octavos, onde espera l'alemán Koepfer

Raúl Entrerríos y María López son la cara y la cruz, con dos victories pal combináu de balonmano y dos derrotes pal de ḥoquei yerba nos dos primeros partíos en Tokyo 2020.

L'entamu de los Xuegos Olímpicos traxo tou tipu de resultaos a los trés representantes asturianos en Xapón. Pablo Carreño sigue alantre en categoría individual, anque dixo adiós en primer ronda en dobles depués de perder xunto col andaluz Alejandro Davidovich colos colombianos Juan Sebastián Cabal y Robert Farah por 2-6 y 4-6.

Nel camín al oxetivu principal de medaya del xixonés va cruciase agora l'alemán Dominik Koepfer, 59 del ranking ATP, el miércoles n'horariu por confirmar. Enantes superara al estauxunidense Tennys Sandgrend por 7-5 y 6-2, y, esta mañana, dio la vuelta al marcador nel partíu énte'l croata Marin Cilic: 5-7, 6-4 y 6-4.

Trunfos de prestixu

Un gran nivel de xuegu ta amosando la seleición d'España de balonmano, con Entrerríos como capitán. El combináu dirixíu por Jordi Ribera derrotó a dos de los equipos punteros de les Olimpiaes, Alemaña y Noruega, en finales axustaos pol mesmu resultáu de 28-27.

Francia lidera'l grupu A con 4 puntos, los mesmos qu'España, mentes que con 2 tán Alemaña y Noruega, y con 0 Brasil y Arxentina. El siguiente partíu d'Entrerríos va ser el miércoles a les 12.30 hores (19.30, hora llocal) contra Brasil.

Positivu del entrenador

Nun hai tanto optimismu na seleición española femenina de ḥoquei yerba, con capitana tamién asturiana. A les dos derrotes nos dos primeros partíos contra Australia (1-3) y Arxentina (0-3) súmase'l positivu por COVID-19 del entrenador, l'inglés Adrian Lock, que nun pudo sentase entá nel bancu.

España zarra la clasificación del grupu B empatada con Xapón, con Australia y Nueva Zelanda con 6 puntos, y Arxentina y China con 3. Pasen a cuartos los 4 primeros y l'equipu de López nun se pue permitir más pinchazos, con Nueva Zelanda, el miércoles a les 4.45 hores (11.45, hora llocal), como rival próximu.