Lucía González enllaza'l so tercer Estatal de ciclocross siguíu

Dominiu asturianu na prueba femenina, na qu'Aida Nuño foi segunda y Sara Cueto, cuarta.

La sierense Lucía González Blanco tornó a llevar l'oru nel Campeonatu d'España de ciclocross na prueba élite celebrada ayeri en Xátiva. Ganadora nes ediciones del 2013, 2020 y 2021, y una habitual nel podiu d'esta competición, la ciclista del Nesta-MMR abrió pronto diferencia coles sos rivales y pudo aguantar la distancia con elles, hasta sacar 1 minuntu y 6 segundos en meta a Nuño (Rio Miera-Cantabria Deporte), que remontó posiciones llueu d'un incidente na primer vuelta d'una carrera cola que la tamién sierense ponía fin a la so espectacular carrera, con siete títulos élite estatales.

Nun pudo completase'l podiu asturianu dafechu que se dio l'añu pasáu al vese superada Cueto (Unicaja Banco-Conceyu de Xixón) nun esprín pola valenciana Sofía Rodríguez Revert (Teika-Gsport), entrando entrambes a 1 minutu y 17 segundos. En categoría masculina, mentes, el ganador foi l'alicantín Felipe Orts (Burgos-BH).

"Toi mui contenta cola victoria y cómo me salió la carrera. Garré ventaya dende la primer vuelta y eso permitióme nun asumir riesgos nes zones complicaes y completar una carrera llimpia siguiendo'l mio ritmu. Desués de la Navidá había que demostrar que siguíamos teniendo un bon golpe de pedal. Foi una carrera rápida, el circuitu favorecíame y creo que demuestro que llego nun bon estáu de forma a xineru, que ye un mes con munchos oxetivos", apuntó González depués d'algamar el so cuartu oru.

Na imaxe, Nuño, González y Rodríguez Revert. Semeya propiedá de la Real Federación Española de Ciclismo.