Los trenes nuevos de Feve, que finalmente yeren más pequeños, llegaríen a les víes asturianes nel 2026

El secretariu xeneral d’Infraestructures del Ministeriu de Tresportes, Movilidá y Axenda Urbana, Xavier Flores, afirmó en Santander que la razón de la paralización de la construcción de los trenes nuevos de Feve nun foi pol fechu de que nun entraran nos túneles, sinón porque seríen más pequeños que los actuales. Marcó l’añu 2026 como’l del entamu de circulación de los mesmos per Asturies.

Ési ye l’oxetivu ministerial, pendiente de que’l fabricante CAF afite un cronograma nuevu y axuste al máximu los plazos de fabricación. El nun tener que llicitar un contratu nuevu, sinón modificar l’actual, tranquilizó a los gobiernos d’Asturies y Cantabria, pendiente de la llegada de 31 trenes d’anchu métricu pa sustituyir los actuales, al límite d’usu.

Alejandro Calvo, conseyeru de Mediu Rural y Cohesión Territorial, foi’l representante asturianu nesti primer grupu de trabayu pal siguimientu del diseñu y fabricación de los trenes nuevos pa los dos territorios, acompañáu pol viceconseyeru d’Infraestructures, Movilidá y Territoriu, Jorge García López. Por parte del ministeriu acudió Flores, y polos anfitriones José Luis Gochicoa y Francisco Javier López, responsables d’Obras Públicas, Ordenación del Territorio y Urbanismo y d’Industria, Turismo, Innovación, Transporte y Comercio, de manera respeutiva.

Flores esplicó a los presentes les circunstancies que llevaron a la necesidá d’aplicar un procedimientu singular para determinar el gálibu de los trenes y qu’implicó un retrasu de 2 años na execución del contratu firmáu ente Renfe y CAF pa la fabricación de les 31 unidaes por unos 190 millones d’euros. Éstos deberíen tar pal 2024, pero la fecha nueva marcada pol ministeriu ye’l 2026.

“Nun se diseñó de forma definitiva tren nengún y, sobre manera, nun se completó’l diseñu de nengún tren que nun pase pelos túneles”, apuntó, afirmando que’l retrasu diose pa que los trenes nun foran más pequeños que los actuales por cuestiones de seguranza. Por ello decidieron emplegar el métodu comparativu, consistente en diseñar la seición de los trenes nuevos a partir de la seición de los qu’anguaño circulen pela rede.

Reclamación de más trenes p’Asturies

A la salida del aconceyamientu del grupu de trabayu, Calvo aseguró que la situación vivida col contrato de los trenes ha conllevar compensaciones p’Asturies, reclamando más vehículos pal país. Tamién punxo en valor la postura común con Cantrabria con esti asuntu, que se va caltener pal alcuentru anunciáu del día 20 de los presidentes Adrián Barbón y Miguel Ángel Revilla cola ministra Raquel Sánchez Jiménez.

Na semeya, García López y Calvo, primeros de la mesa pela derecha, ayeri nel primer aconceyamientu grupu de trabayu, con Flores enfrente centráu.