Adif cesa al responsable d'Inspeición y Teunoloxía de Vía pol casu de los trenes de Feve

Renfe toma la mesma midida col xerente de Material encargáu del proyeutu.

La ministra de Tresportes, Movilidá y Axenda Urbana, Raquel Sánchez Jiménez, anunciara'l sábadu destituciones pol casu de los trenes de Feve que provocará un retrasu de 3 años na so llegada y puesta de serviciu n'Asturies y Cantabria al haber un error nes midíes qu'impidía'l so pasu per túneles de la rede, y éstes nun tardaron. Esta mesma tarde Adif y Renfe comunicaron el cese de dos responsables.

Nel casu de la empresa encargada de la infraestructura cayó'l titular de la xefatura d'Inspeición y Teunoloxía de Vía "como midida preventiva, a la espera del resultáu de l'auditoría anunciada pola ministra". "Esta decisión permitirá la participación d'otra persona nel grupu de trabayu que se va crear nel senu del Ministeriu de Tresportes, Movilidá y Axenda Urbana pa zarrar con velocidá'l diseñu del tren llicitáu por Renfe mientres se fai l'auditoría", siguió'l comunicáu.

Pela so parte, ésta cesó a la persona responsable del Área de Xestión de Material de Renfe Viaxeros nel momentu de desendolcu del proyeutu de modernización de los vehículos de Feve que circulen per Asturies y Cantabria.

Na semeya, Sánchez Jiménez nun actu esta mañana en València.