El Gobiernu “plantega” al ministeriu “la total renovación de la flota de trenes d’anchu métricu”

El Conseyu de Gobiernu aprobó una declaración institucional na qu’encamienta al Ministeriu de Tresportes, Movilidá y Axenda Urbana a “compensar a Asturies polos incumplimientos y retrasos inasumibles nel ameyoramientu de les comunicaciones ferroviaries”. Ocho midíes conformen el testu, nel que pide “la total renovación de la flota”.

Na entradina reclama tamién que “asuma con urxencia una planificación pública y rigurosa d’inversiones qu’apangue’l mui fuerte deterioru de la so credibilidá, que perxudica la de la propia institución”. La primer midida ye “l’asunción de responsabilidaes”, qu’han algamar “los niveles xerárquicos que correspuenden a tal absurdu, pa que se depuren responsabilidaes y se proceda a les destituciones correspondientes”.

Llueu recuerda que “l’agraviu, que llenda col ridículu y inesplicable a güeyu de la ciudadanía, conllevará’l retrasu na entrega de les unidaes previstes. Unes unidaes que cuerren priesa pa renovar l’actual flota avieyada y deteriorada y, poro, imprescindibles pa que la rede d’anchu métricu ufra un serviciu ferroviario dignu a la ciudadanía”. Nesi sen el Gobiernu “plantega” que “la tramitación alministrativa y los plazos d’execución del contratu correspondiente s’acorten al máximu posible” y que “el contrato faiga firmes les opciones adicionales recoyíes nel pliegu y s’amplíe colos contratos complementarios necesarios pa la total renovación de la flota de trenes d’anchu métricu d’Asturies”.

Señala depués que la llegada d’estos trenes “forma parte d’un oxetivu más ampliu, como ye l’ameyoramientu del serviciu de cercaníes ferroviaries”, pa lo que “ha executarse en tolos sos estremos el plan negociáu col ministeriu y que, según la so propia titular, conlleva una inversión de 997 millones n’Asturies”. Nel restu de los puntos tamién fai referencia a la variante de Payares y al corredor atlánticu, y a “la unidá d’aición plena col Gobiernu de Cantabria”.

Na imaxe, un momentu del aconceyamientu del Conseyu de Gobiernu d'esta mañana, celebráu en Santolaya. Semeya obra d'Armando Álvarez.