Los trabayadores de la EBHI cumplen ocho díes en fuelga de fame

La empresa de mayoría pública, qu'obligó'l domingu a ún de los fuelguistes a trabayar, impide'l pasu de médicos pa revisar l'estáu de salú de los cuatro emplegaos zarraos.

Güei cumplióse la primer selmana dende que cuatro trabayadores d'European Bulk Handling Installation (EBHI), de la que l'Autoridá Portuaria de Xixón ye máxima aicionista, decidieren ponese en fuelga de fame nel llocal del Comité d'Empresa nes instalaciones de la firma n'El Musel. La razón, un ERTE decidíu de manera unillateral y el despíu en diferío de 7 persones al nun cumplir coles tases de reposición.

Ochos díes depués Adrián Serrano, Eduardo López Rodríguez, Adrián Rey y Fernando González Rodríguez non sólo nun recibieron soluciones por parte de la empresa nin de les alministraciones, sinón que denuncien práutiques de la EBHI que van en contra de la so salú y de la seguridá de tolos sos compañeros. Asina, el domingu obligó a trabayar magar que llevara 4 díes en fuelga de fame a González Rodríguez, y nun dexa acceder a los servicios médicos alegando que los sos emplegaos podríen dir a una mutua a Xixón, lo que-yos llevaría a frayar el zarru.

Mientres, fuera, les aiciones solidaries siguen. Esta mañana hebo una concentración na Xunta Xeneral y la playa de L'Arbeyal, na entrada d'El Musel, vien acoyendo a les 20.30 hores paseos solidarios.