Valdés sigue escondiendo'l topónimu asturianu Ḷḷuarca nes lletres turístiques nueves

Los visitantes atopen nel puertu'l nome 'Luarca' cuando la forma oficial ye Luarca/Ḷḷuarca.

El Conceyu de Valdés, gobernáu pol PSOE, escuende'l topónimu asturianu nes lletres nueves instalaes onde la rula pa que los turistes puedan facer una semeya de recuerdu con esi fondu espectacular que ye'l cai de Ḷḷuarca. Otres anteriores asitiaes n'otru llugar de la villa llevaben años escaeciendo tamién el nome tradicional.

Cuando s'aprobó'l decretu qu'afitaba los topónimos oficiales del conceyu nel 2014 el nome de la capital pasó a ser Ḷḷuarca, pero un pidimientu del gobiernu del PSOE col sofitu de tolos grupos municipales (Ciudadanos, PP, Foro y Avanza Valdés) llevó a la Xunta Asesora de Toponimia a dar el preste nel 2021 a contar con una forma billingüe, Luarca/Ḷḷuarca, lo que refugó pa otres poblaciones de Valdés como Cadavéu . La realidá, sicasí, ye que la forma tradicional Ḷḷuarca queda arrequexada de manera sistemática por 'Luarca'.

Iniciativa pol Asturianu llamenta "el pocu procuru pol usu del nome tradicional de la capital valdesana nun conceyu gobernáu pol PSOE, partíu que lleva nel so programa la oficialidá de la llingua asturiana" y recuerda’l deber del cumplimientu de la toponimia oficial tal como recueye la Llei d’Usu y Promoción del Bable/Asturianu. Por esti motivu, reclama "la instalación d’un conxuntu escultóricu col topónimu tradicional de Ḷḷuarca o l'adaptación del esistente pa que tea presente la doble denominación de la villa blanca".