Los Internautes analicen la "inconstitucionalidá" de la Llei Sinde

Les asociaciones d'internautes adelantaron esti miércoles que tán "analizando la posible inconstitucionalidá" del testu pactáu ente PSOE, PP y CiU nel Senáu pa sacar alantre la Llei Sinde.

Según el presidente de l'Asociación d'Usuarios d'Internet (AUI), Miguel Pérez, que puea zarrase una páxina web "por si pue facer dañu; ye algo que nun cabe na Constitución".
  
Amás d’otres consideraciones sobre'l conteníu de la Llei, concretamente tán analizando'l puntu qu'establez que la Comisión de Propiedá Intelectual pueda adoptar midíes preventives contra webs que "causaren o seyan susceptibles de causar un dañu patrimonial".
  
"Va poder adoptar les midíes pa que s'interrumpa la prestación d'un serviciu que vulnere derechos de propiedá intelectual o pa retirar los conteníos que vulneren los citaos derechos, siempre que'l prestador, directa o indirectamente, actúe con ánimu d'arriquecimientu o causara, o seya susceptible de causar un dañu patrimonial", plantega'l testu.
  
Nesta llinia, Pérez sorrayó que son más d'una trentena d'organizaciones de tou tipu les que tán trabayando en desarrollar acciones de quexa conxuntes, que van dir faciéndose na midida na que surda'l calendariu".
  
"Nun queremos que naide s'aproveche del trabayu de los demás, pero ésta ye una llei pa criminalizar al enllazador, y d'esta manera tendría que zarrase internet", argumentó, pa dempués señalar que "hai que cambiar el modelu de negociu pa que'l futuru nun pase polo que quieren imponemos, los que trunfaron col modelu anterior".

"Capacidá inquisitoria terrible"
El presidente de l'Asociación Música y Internet (AMI), Santiago Ureta, foi más allá y faló de qu'esta llei ye una midida cautelar ensin precedentes, con una "capacidá inquisitoria terrible". Víctor Domingo, de l'Asociación d'Internautes (AI), denunció, coles mesmes, que "llevaron al BOE una Comisión que ye d'antes de 1975".
  
Pérez plantegó tamién qu'ésti "nun ye un problema de piratería", yá que "puen prohibise toles descargues", pero nun va valir de nada si la industria nun s'adapta a los nuevos tiempos. Asina, reclamó una reforma "a fondu" de la Llei de Propiedá Intelectual y la eliminación del canon, pues "perxudica al creador y al usuariu y namás beneficia al intermediariu". "Hai soluciones, pero nun pasen per criminalizar al usuariu", añadió.
  
Pela so parte, Domingo recordó que yá presentaron toos xuntos un pidimientu nel Senáu pa que nun sacaren alantre la Llei Sinde, y afirmó que la enmienda pactada ye "una chambonada" que, amás, nun tien más garantíes xudiciales, a pesar de qu'eso ye lo que defenden los partíos firmantes.
  
Al so xuiciu, con esta enmienda "dase más facultaes a la Comisión de Propiedá Intelectual, y pásase a los xueces a la categoría de notarios". "Ta potenciándose la Comisión sin una tutela xudicial efectiva, baxar a los xueces a certificadores, dao que tolo llevaría una Comisión política, convirtiendo amás a los provisores na policía, pues ellos tienen los númberos IP de los usuarios", espunxo.
  
Sobre'l compromisu del Gobiernu d'adaptar el canon a les sentencies europees, Domingo dixo que ye algo que yá tenía que tar fecho, y avanzó que más de 60 conceyos tán yá reclamando lo que pagaron por esti conceptu dende'l 2003, una cifra que, según señaló, la Comisión Nacional de la Competencia establez en 160 billones d'euros.
  
Pela so parte, el presidente de l'Asociación Nacional d'Empreses d'Internet (ANEI), Miguel Errasti, recordó que la mayor parte de los agospiadores webs -más del 90 por cientu- nun tán n'España, polo qu'esta llei sería "ineficaz". Avisó de que la llei pue amás crear inseguridá xurídica y una migración hacia otros países del sector del hosting, lo cual provocaría cuantioses perdes económiques.

Dimisión de la ministra
Exerciendo como voceru de tolos presentes, Domingo esplicó que a ellos nun-yos incumbe l'anunciu de dimisión d'Álex de la Iglesia al mandu de la Academia de Cine, pero que lo que sí quieren ye que dimita la ministra de Cultura, Ángeles González Sinde, quien "lleva dos años de regalu nel Ministeriu".
  
Sobre esti asuntu, Pérez indicó que-y pidieron xuntes directamente a la ministra en delles ocasiones, algunes d'elles recientemente y hasta entregándo-y documentación en mano en dellos actos públicos, a pesar de lo que nun llograron una respuesta positiva.