La noticia de l'aprobación de la toponimia de Pravia, la más vista del 2021 n'Asturies.com

Éstes son les diez informaciones que más interés xeneraron ente los nuesos llectores.

El 22 de febreru Asturies.com asoleyaba la noticia 'La toponimia tradicional de Pravia pasa a ser la única oficial'. Esti conceyu convertíase nel númberu 68 en recuperar los sos nomes de llugar tradicionales depués de que l'espediente ellaboráu pola Xunta Asesora de Toponimia tuviera'l preste del Plenu municipal y el Conseyu de Gobiernu, quedando yá espublizáu'l decretu toponímicu nel BOPA.

La información tuvo un gran movimientu en redes sociales, sobre manera ente los habitantes del propiu conceyu, xenerando un gran alderique la escoyeta de Somáu pa referise al derogáu 'Somado' por cuenta de 'Somao', emplegáu pol coleutivu vecinal. Somáu yá yera'l nome recoyíu nel Nomenclátor de l’Academia de la Llingua Asturiana.

Les parroquies d'Arangu, Cordoveiru, Courias, Escuréu, San Damías y Muros, onde s'asitia Somáu, recuperaron tamién el so nome tradicional en sustitución de ‘Arango’, ‘Cordovero’, ‘Corias’, ‘Escoredo’, ‘Sandamías’ y ‘Somado’, de manera respeutiva. Otros cambios que s'entamaron forone el d'Ablanéu por ‘Ablanedo’, el Villamexán por ‘Villameján’ o'l de Cañéu por ‘Cañedo’, mentes que s'incorporaron topónimos non rexistraos como El Cogollu, Llanteiru o L’Estornín.

La llista

Les noticies más lleíes esti 2021 incluyénse nesta llista y pueden consultase calcando sobre elles. Al empar, deseamos un perbón 2022 a los nuesos usuarios, un añu nel qu'Asturies.com cumple 25 años d'información diaria d'Asturies y del mundu en llingua asturiana.

1. La toponimia tradicional de Pravia pasa a ser la única oficial
2. Pasu atrás nel usu del asturianu na Universidá d'Uviéu: la institución dexa d'emplegar el logu trillingüe
3. Piñán vese obligada a dar una lleición de llingüística a Pablo González
4. RTPA retira de 'A la carta' el programa 'La nueche de...' del sábadu tres la quexa de Llan de Cubel
5. "Vamos siguir llevando 'Uviéu' na camiseta porque nun ye nada illegal y tamos mui arguyoses de facelo", afirma Martínez
6. Una campaña viral per WhatsApp da respuesta con infografíes a les mentires llanzaes contra l'asturianu
7. El Congresu encamienta al Gobiernu a "impulsar y apoyar" una reforma estatutaria n'Asturies pa declarar la oficialidá
8. Histórica
9. L'alcalde de Ferrol pide perdón por un tweet contra l'asturianu de la xerente de Turismu
10. La Conseyería d'Educación ta refugando la inclusión del B2 d'asturianu nel rexistru personal de formación de los docentes