Los 72.804 paraos colos que finó l’añu Asturies supón la cifra más baxa n’avientu dende’l 2008

La contratación pola campaña navidiega permitió que se punxera fin a cuatro meses d’aumentu del paru n’Asturies. N’avientu menguó en 553 persones p’asitiar el total de desemplegaos en 72.804 persones, la cifra más baxa dende’l 2008 al finar l’añu.

El descensu del paru rexistráu’l mes pasáu en comparanza con payares foi del 0,75 por cientu, inferior a la media estatal, que foi del 1,55 por cientu pa sumar un total de 3.202.297 desemplegaos. Los territorios con meyores datos foron Andalucía (2,75 por cientu) y Murcia (2,56), con permisu de les ciudaes autónomes de Melilla (4,08) y Ceuta (3,97), mentes que vivieron aumentos Cantabria (1,95), La Rioja (1,07) y Illes Balears (0,01).

N’Asturies la mengua produzse ente les muyeres, tolos grupos d’actividá, nel sector servicios y nel grupu de demandantes ensin trabayu anterior. Nel sector industrial, rexístrense descensos n’emplegos rellacionaos cola metalurxa y la fabricación de fierro.

Nel llau contrariu, hai medra na construcción y nel restu de la industria, amás de na agricultura y na pesca, dalgo esmoleciente de cara al comienzu del 2019 teniendo en cuenta que la tendencia de los meses últimos yera negativa, con un aumentu progresivu de les cifres del paru dende agostu que n’avientu quedó frenada poles contrataciones por mor de la campaña navidiega.

63 meses de descensu interañal

Si comparamos los datos actuales colos del añu pasáu, Asturies rexistró 3.743 paraos menos, lo que supón una mengua del 4,89 por cientu y el 63 mes siguíu de descensu interañal. La media estatal foi del 6,17 por cientu, destacando les cifres de Melilla (9,94 por cientu), Castilla y Lleón (9,59) y Extremadura (8,84), con namái trés territorios con peores cifres que les asturianes: Cantabria (2,47), Canarias (4,20) y Andalucía (4,43).

Otra manera, el númberu d’afiliaos a la Seguridá Social creció n’avientu un 0,96 por cientu (3.455 persones) en rellación al añu pasáu, hasta alcanzar los 364.156 ocupaos. Con respeuto a payares, l’incrementu de cotizantes fue del 0,15 por cientu (558 persones).