Les contrataciones de la campaña navidiega frenaron cuatro meses d’aumentu del paru n’Asturies, que finó l’añu con 69.957 desemplegaos. Esta cantidá supón una mengua con respeuto a les cifres col que’l país entró nel 2019, siendo’l tercer territoriu que más paraos perdió, y la más baxa nesti mes dende'l 2008.
Dende ochobre del 2013 Asturies vien encadenando baxaes interañales del paru. En comparanza col 2019, la mengua foi del 3,91 por cientu, un total 2.847 persones, siendo la media estatal del 1,21 por cientu.
Los territorios con peores cifres son Melilla (13,75 por cientu), Castilla-La Mancha (3,19 por cientu) y Illes Balears (2,08 por cientu), mentes que Castilla y Lleón rexistró un descensu del 5,08 por cientu y Euskadi, del 4,61 por cientu. La baxada estatal foi 38.692 desemplegaos, p’asitiar el total en 3.163.605.
Con respeuto al mes anterior, el paru menguó en 920 persones, un 1,30 por cientu, siendo la media estatal del 1,08 por cientu. D’esta forma Asturies frena la tendencia d’aumentu de la cifra de persones ensin emplegu qu’arrancó n’agostu.
El sector servicios lidera esta baxada nel país, con un 2,28 por cientu de reducción. El descenso del númberu de paraos na hostelería y el comerciu representa’l 51 por cientu del rexistráu, y la disminución nes actividaes de l’alministración pública, educación y servicios sanitarios y residenciales supón el 34 por cientu del total.
La comunidá con meyor resultáu ye Andalucía, con una mengua del 2,10 por cientu, mentes que Ceuta y Melilla rexistren un 7,02 y un 4,23, de manera respeutiva. Aumenta’l paru n’avientu en La Rioja (2,89 por cientu), Navarra (2,41 por cientu), Euskadi (0,34 por cientu) y Cantabria (0,08 por cientu).
Seguridá Social
L’afiliación a la Seguridá Social creció nos doce meses últimos del añu en 3.517 afiliados (0,97 por cientu) hasta asitiase en 367.673 persones, el meyor datu pa un mes d’avientu dende’l 2011.
Por contra, en rellación a payares, el númberu de cotizantes redúxose un 0,13 por cientu, lo que supón 487 afiliados menos.
Adxuntu | Tamañu |
---|---|
![]() | 1.69 MB |