Xube'l paru otru mes n’Asturies: 740 desemplegaos más

Asturies suma cuatro meses siguíos d’aumentu de les cifres del paru. En payares la medra foi de 740 persones, cantidá menor que n’ochobre, cuando se rexistraron 2.055 paraos más, lo que dexa la cifra total de 73.357 desemplegaos nel país.

A nivel estatal el número de persones rexistraes nes oficines de los Servicios Públicos d’Emplegu baxó en payares en 1.836 personas, una cayida que se da per primer vegada tres dos años d’aumentos nesti mes. La media foi una baxada del 0,06, pa quedar nun total de 3.252.867 desemplegaos, mentes que n’Asturies xubió un 1,02 por cientu.

El mayor aumentu del paru diose nes Illes Balears, con un acusáu 19,23 por cientu, siguíu por La Rioja (2,78 por cientu), Cantabria (2,66 por cientu) y Asturies. Rexistraron los mayores descensos Melilla (11,98 por cientu), Castilla-La Mancha (2,04 por cientu) y Extremadura (1,12 por cientu).

62 meses de descensu interañal

En comparanza con payares del añu pasáu, Asturies cuenta con 4.567 paraos menos, lo que supón una cayida interañal del 5,86 por cientu. Trátase del meyor datu rexistráu nesti mes dende’l  2009 y el númberu 62 de descensu continuáu.

La media interañal estatal foi del 6,37 por cientu, siendo los territorios con meyores datos Melilla (14,13 por cientu), Castilla y Lleón (9,99 por cientu) y Galicia (8,98 por cientu). Nel llau contrariu atopamos a Canarias (4,43 por cientu), Andalucía (4,77 por cientu) y Euskadi (5,30).

Otra manera, el númberu d’afiliados a la Seguridá Social creció en 3.263  personas en términos interañales (0,91 por cientu), hasta algamar 363.597 cotizantes. En rellación al mes d’ochobre, la filiación redúxose en 316 personas (0,09 por cientu).