L’ALLA pauta col Conceyu de Xixón la ellaboración d’un protocolu de collaboración pa la dignificación del idioma

Xosé Antón González Riaño, presidente de l’Academia de la Llingua Asturiana (ALLA), y Ana González Rodríguez, alcaldesa de Xixón, celebraron esti miércoles una xunta a pidimientu de la institución académica. Ente los compromisos afitaos destaca la ellaboración d’un protocolu de collaboración col envís de trabayar a comuña pa favorecer midíes de dignificación social del idioma nel conceyu.

La Casa Conceyu acoyó l’alcuentru, nel que tamién tuvieron presentes l’académicu Pablo Xuan Manzano, representante de l’Academia nel Conseyu Asesor de la Llingua del Conceyu de Xixón, y el conceyal d’Educación y Cultura, Alberto Ferrao. “Dende l’ALLA quier sorrayase lo positivo del aconceyamientu, tanto dende’l puntu de vista del perbón clima algamáu nel mesmu como na visión compartida de lo que’l conceyu de Xixón pue ufrir dende la perspeutiva recuperadora de la llingua y la cultura d’Asturies”.

Ente los alcuerdos algamaos destaca la ellaboración d’un protocolu de collaboración col envís de trabayar a comuña pa favorecer les midíes de dignificación social del asturianu nel conceyu, asina como pa entamar proyeutos concretos d’actuación conxunta y descentralizada que tengan a Xixón como noyu central d’actuación. Na xunta tamién se fixo un repasu y una bona valoración de les xeres llevaes alantre hasta agora pol consistoriu en rellación cola normalización social del asturianu y s’estudiaron propuestes nueves pa desendolcar a lo llargo d’esta llexislatura.

Na semeya, xuegu de mesa creáu pola Oficina de Normalización Llingüística de Xixón pa promocionar l'idioma ente los escolinos, de nome 'Xixónpolis'.