González Riaño va aconceyar cola alcaldesa Ana González Rodríguez

L'Academia de la Llingua Asturiana (ALLA) y el Conceyu de Xixón caltienen dende va años una estrecha collaboración que permitió la espublización de dellos llibros importantes.

El presidente de la institución académica, Xosé Antón González Riaño, y l'alcaldesa Ana González Rodríguez van aconceyar mañana a les 9 hores na Casa Conceyu. Nel alcuentru van intercambiar idees al rodiu de les midíes de dignificación social del asturianu en Xixón, amás de considerar les posibles llinies de collaboración ente dambes instituciones.

El Conceyu y l'ALLA vienen trabayando xuntos dende años atrás. Esta bona rellación permitió la espublización de dellos llibros, como 'Esbozo del diccionario bable del centro y oriente de Asturias' de José García Peláez 'Pepín de Pría', trescripción anotada d’un volume del diccionariu de Ramón A. de Rato (1891) como parte del trabayu preparatoriu pal so diccionariu, o la reedición en formatu facsímil de la obra de Matías Conde 'Sol en los pomares', ente otros, amás de sofitu n'estudios toponímicos y otros alcuerdos.