El Conceyu de Xixón va siguir completando la rotulación n’asturianu na rede viaria y nes sos dependencies

L’Academia de la Llingua Asturiana (ALLA) comunicó esti xueves los detalles del so conveniu col Conceyu de Xixón, que nun tien naturaleza económica. La institución va asesorar llingüísticamente al equipu de gobiernu municipal, que se compromete a completar la rotulación n’asturianu nes sos dependencies y rede viaria, y a collaborar na normalización social del idioma.

La xunta de gobiernu llocal dio’l preste’l 1 d’avientu al alcuerdu cola ALLA que s’empezó a tratar tres les eleiciones y que va tener validez hasta’l 31 d’avientu, cola idea de prorrogalu añu a añu hasta’l 2023. L’alcaldesa Ana González Rodríguez y el presidente académicu Xosé Antón González Riaño repasaron y valoraron nun alcuentru celebráu’l 30 d’ochobre del 2019 los avances últimos na normalización social del asturianu dientro de l’aición del Conceyu, y apautaron les bases d’esti conveniu que tien como fundamentu la Llei d’Usu y Promoción del Bable/Asturianu.

“L’Academia de la Llingua Asturiana va asesorar llingüísticamente al Conceyu de Xixón nel desendolcu de les sos xeres y actividaes de promoción del idioma nos actos públicos y na vida diaria del Conceyu”, resume la institución, que va coordinar xunto col gobiernu municipal la “política de normalización social nel conceyu”. El compromisu del Ayuntamientu céntrase en “siguir completando la rotulación n’asturianu de los sos servicios y dependencies, asina como de la rede viaria, igual na zona urbana que na rural”, pa lo que solicita propuestes normatives nesti ámbitu.

Toponimia de les parroquies

La institución académica va siguir participando nel Conseyu Asesor de la Llingua de Xixón y nos xuraos de los premios lliterarios convocaos pol Conceyu pa la promoción del idioma, y “oblígase a aconseyar y revisar el trabayu de recoyida de la toponimia xixonesa con vistes a la edición de los cartafueyos correspondientes a les 19 parroquies qu’entá queden por estudiar”. Por último, inxerirá a Xixón como llugar d’espardimientu de les sos xeres editoriales, formatives y culturales y facilitará a la Oficina de Normalización Llingüística un exemplar de caúna de les obres del so fondu editorial.

Na semeya, una señal n'asturianu a la entrada de la villa.