La Xunta Xeneral encamienta al Gobiernu a que’l B2 y el C1 puntúen como méritu nes oposiciones docentes

Cola oposición única de Ciudadanos y VOX, amás de la de Pedro Leal y Luis Armando Fernández Bartólome, aprobóse la propuesta de resolución de la Federación Socialista Asturiana (FSA-PSOE) con respeuto a les pruebes de certificación de Llingua Asturiana adaptaes al Marcu Común Européu de Referencia pa les Llingües. Solicitábase que nes próximes oposiciones docentes puntuaren como méritu.

Con 43 de los 45 votos posibles emitíos –ún d’ellos foi telemáticu–, la propuesta de resolución socialista presentada pa la tercer y última sesión del Alderique d’Orientación Política Xeneral del añu llexislativu 2022-2023 qu’encamentaba al Conseyu de Gobiernu “a modificar la normativa de les oposiciones a la mayor rapidez posible pa que les certificaciones de conocimientu de la llingua asturiana que s’acreiten per aciu d’un esame entamáu pola Conseyería d’Educación puntúen como méritu nes oposiciones docentes próximes que s’organicen nel Principáu” salió ayeri alantre con 37 votos a favor y 6 en contra. Sofitaron esta iniciativa’l Partido Popular (PP), Podemos, Asturies pela Izquierda (IX-IAS), el diputáu de Foro Adrián Pumares y la vocera de Ciudadanos, Susana Fernández Álvarez.

Por contra, opunxéronse los restantes parllamentarios de Ciudadanos, VOX –Ignacio Blanco nun votó– y los diputaos Leal, espulsáu de Foro, y Fernández Bartolomé. Ésti últimu, apartáu del grupu naranxa, ta agora nel mestu.

Pruebes en marcha

Precisamente esta selmana tán celebrándose les pruebes de cerfificación pa los niveles mediu B2 y avanzáu C1, el más altu, nel que participen un total de 363 aspirantes. Ye la tercer convocatoria del primeru y la segunda del segundu.