Iniciativa ufierta un modelu d’alegación pa l’acreitación como méritu del C1 y B2 d'asturianu nel concursu de tresllaos

La Conseyería d’Educación nun valora los títulos C1 y B2 de certificación de Llingua Asturiana adaptaos al Marcu Común Européu de Referencia pa les Llingües na baremación provisional del concursu de tresllaos 2022-2023 a les persones que los presentaron. Iniciativa pol Asturianu ufierta un modelu a los afeutaos pa que puedan presentar una alegación.

“Delles persones contactaron cola nuesa organización pa treslladanos la problemática pa incluyir na baremación de puntos los títulos de C1 y B2 en Llingua Asturiana del personal funcionariu de carrera participante nel concursu de tresllaos, convocáu mediante Resolución de 10 d’ochobre de 2022”, esplica la organización. Dada la situación, pon a disposición de tol mundu “un modelu de reclamación pa solicitar la baremación d’esos títulos pa presentar y esixir esa puntuación”.

Dase’l casu que l’Alderique d’Orientación Política Xeneral últimu, correspondiente al añu llexislativu 2022-2023, cola oposición única de Ciudadanos y VOX, amás de la de Pedro Leal y Luis Armando Fernández Bartólome, aprobóse la propuesta de resolución de la Federación Socialista Asturiana (FSA-PSOE) que solicitaba que nes próximes oposiciones docentes puntuaren como méritu. Pa esti concursu de tresllaos docente de l'Alministración asturiana, les persones qu’incluyeron títulos d’inglés y asturianu vieron como’l primeru contaba na baremación provisional y el segundu quedaba escluyíu.