Xira pola Oficialidá: una selmana d'actividaes con primeres paraes en Bimenes y Madrid

La previsión ye qu'entame en marzu nel conceyu yerbatu y siguir n'abril na capital del Estáu.

La Xira pola Oficialidá va arrancar el mes próximu en Bimenes, cola fecha concreta entovía por pesllar. Ye la idea cola que trabayen la Fundación Almastur y Iniciativa pol Asturianu, entidaes impulsores d'esti movimientu cívicu abiertu a tola ciudadanía y organizaciones "culturales, vecinales, sindicales, empresariales o de cualquier otru calter", como apunta'l manifiestu conxuntu asoleyáu esta mañana nel Atenéu Obreru de Xixón, pola oficialidá de les llingües del país.

"Quiximos entamar en Bimenes por ser el primer conceyu d’Asturies que normalizó l’usu del asturianu", apuntó Carlos Rubiera, presidente del Patronatu de la Fundación Almastur en referencia a la declaración d'oficialidá del 1997. Asina, ta preparándose una selmana d'actividaes "que van dir variando de conteníos a midida que vayamos desendolca la Xira pola Oficialidá y se vayan incorporando persones y otres entidaes", añade.

Van entamase delles esposiciones. Una va tener como exa "la bibliografía fundamental de la llingua: testos normativos como pue ser el Diccionariu normativu, la Gramática, la normativa, el Diccionariu Etimolóxicu, los testos consultivos, les normes ortográfiques…, y tamién una muestra mui representantiva del trabayu lliterariu que se fixo dende’l Surdimientu, especialmente traducciones de grandes clásicos d’otros idiomes, y de lliteratura contemporánea".

Cola Conseyería de Cultura, Política Llingüística y Turismu hai amás un principiu d'alcuerdu pa la cesión de la esposición 'Voces' sobre la historia de la llingua asturiana y "tenemos la idea, tamos empezando a xestionala, de contar cola collaboración d’artistes plásticos que nos cedieran obra pa una esposición". Estes exhibiciones taríen tola selmana abiertes al públicu y tamién "habría tolos díes actos como pueden ser conferencies, debates, meses redondes, proyecciones, comentaes, etc, pa zarrar, dependiendo un poco de la disponibilidá de llocales, previsiblemente de sábadu o de domingu en matinal, con un actu reivindicativu musical con músicos asturianos".

"Ési sería l’esquema col que funcionaríamos. Loxicamente en cada sitiu habrá variaciones de programa y de les persones que participen, anque va haber una repetición siempre de les temátiques y del esquema de trabayu", completó Rubiera.

La parada siguiente, en collaboración col Centro Asturiano, va ser Madrid, a lo que va siguir un parón en mayu por cuenta de les eleiciones. La Xira pola Oficialidá va retomar el so percorríu pelos conceyos d'Asturies y otres autonomíes con llingua propia en branu.

Na semeya, Iván Llera, presidente d'Iniciativa pol Asturianu, y Rubiera, roblen el conveniu.