La UABRA encara la so segunda selmana

Estrénense los últimos dos 'Cursos d'Afondamientu Cultural y Llingüísticu' y hai programaes actividaes complementaries estos díes tanto en Casu como n'El Franco.

La XIII Universidá Asturiana de Branu (UABRA), qu'entama l'Academia de la Llingua Asturiana (ALLA) en collaboración cola Universidá d'Uviéu, vive yá la so segunda selmana d'actividá n'El Campu y n'A Caridá. El primeru acueye el ‘Cursu Avanzáu de Llingua Asturiana’, mentes que la población del occidente ye sede de la segunda fase del cursu de 'Capacitación Docente en Eonaviego o Gallego-asturiano'.

En Casu arrancaron güei dos de los cuatro 'Cursos d'Afondamientu Cultural y Llingüísticu' programaos. Son el de '50 años en movimientu: ámbitos y espacios de desendolcu, normalización y vindicación de la llingua asturiana na historia recién', que van impartir Cristóbal Ruitiña, Inaciu Galán, Marcos Rodríguez Álvarez, Pilar Fidalgo, Rafael Rodríguez Valdés, Ramón Lluís Bande, Xicu Ariza y Xune Elipe, y 'Recoyida y recuperación de la tradición oral y musical', con Xosé Antón Fernández ‘Ambás’, Ramsés Ilesies, José Ignacio Suárez, Mapi Quintana y Llorián García Flórez como maestros.

Conferencies y Nueche en Danza

Les actividaes complementaries de la UABRA, abiertes a tola ciudadanía, siguen mañana n'El Campu cola conferencia de la escritora Blanca Fernández entitulada 'Lliteratura de xéneru n’asturianu: un nuevu camín d’anovamientu' a les 19.15 hores nel Centru d’Interpretación del Parque Natural de Redes, onde'l xueves a la mesma hora'l cineasta casín Samuel Fernandi va presentar dos de los sos trabayos cinematográficos, 'El diañu' y 'Manual de la siega', nel contestu de la conferencia 'Patrimoniu inmaterial: fonte pa la creación d'ún imaxinariu audiovisual asturianu'. El miércoles va haber mentes cita musical, una Nueche en Danza a les 22.15 hores na plaza d'El Campu, con un taller de baille tradicional.

N'A Caridá'l miércoles a les 18 hores nel Complexo Cultural As Quintas la normalizadora llingüística Ángela Ferreira va falar de les 'Funcióis da Oficina Cultural y Llingüística da Fundación Parque Histórico del Navia'. Al día siguiente, a les 10.30 hores na Biblioteca Municipal As Quintas, l'alumnáu del cursu va participar nel taller 'Xunta de mitos', "el mundo máxico d’Asturias núa historia cuntada con marionetas".

Na semeya, participantes de la segunda selmana de la UABRA xinten nel comedor de los cursos n'El Campu.