El Campu recibe a los estudiantes de la UABRA

Los cursos de l'Academia de la Llingua Asturiana (ALLA) arrancaron nuna xornada soleyera. Los casinos van poder beneficiase de les actividaes complementaries entamaes estes dos selmanes.

La XIII Universidá Asturiana de Branu (UABRA), que s'entama en collaboración cola Universidá d'Uviéu, yá ta en marcha. Dende güei y hasta'l día 11 d'agostu más de mediu centenar d'alumnes y alumnos va agospiase nel albergue del Conceyu de Casu, amás d'un ampliu grupu de profesores, y dar clase nel centru d’interpretación del parque y nel centru social en dalgunos de los cursos que s'ufierten.

Esta mañana arrancaron el ‘Cursu Avanzáu de Llingua Asturiana’, con dalgunos estudiantes del elemental al nun completase la matrícula, y los dos primeros de los de ’Afondamientu Cultural y Llingüísticu', el clásicu de 'Capacitación pa la traducción al asturianu’ y el nuevu de 'Anovamientu curricular nel marcu de la LOMLOE (Educación Primaria y Secundaria)'. La selmana qu'entra va ser el turnu del de '50 años en movimientu: ámbitos y espacios de desendolcu, normalización y vindicación de la llingua asturiana na historia recién' y del de 'Recoyida y recuperación de la tradición oral y musical'.

A les 11 hores tuvo llugar la inauguración oficial cola presencia de María Cristina Valdés, direutora de la UABRA, y el secretariu nomáu recién, Inaciu Galán, amás del alcalde Miguel Ángel Fernández Iglesias y de la vicerrectora d'Estensión Universitaria y Proyeición Cultural de la Universidá d'Uviéu, Pilar García Cuetos. Un actu que contó cola animación nel esterior de la Banda Gaites Garulla.

"Va tou mui bien, con un tiempu maraviyosu. El recibimientu d'El Campu foi inmeyorable", espresó esta tarde Valdés a Asturies.com. La tamién profesora nel cursu 'Capacitación pa la traducción al asturianu’ afirmó que "tamos mui contentos cola participación", rescamplando que "ye la primer vez que celebramos la UABRA equí".

Conferencies y música

Na UABRA, como ye vezu, l'actividá académica complétase con otra complementaria abierta a tolos vecinos del llugar. Asina, nesta primer selmana ta prevista mañana una conferencia entitulada 'Un averamientu al paisaxe natural y cultural de Redes', a cargu de Vicente Manuel Espina, direutor del Parque Natural de Redes, a les 19.15 hores nel Auditoriu del Centru d’Interpretación.

El miércoles, a les 22 hores, LaKadarma va actuar n'El Campu, y el xueves va tener llugar una segunda conferencia, a cargu nesta ocasión de Francisco José Llera Ramo al respeuto de 'La urbanización del asturianu', nel mesmu llugar y a la mesma hora que la primera y les restantes, que van protagonizar Blanca Fernández, el martes 8, sobre 'Lliteratura de xéneru n’asturianu: un nuevu camín d’anovamientu', y el cineasta Samuel Fernandi, el xueves 10, nesti casu centrándose nel 'Patrimoniu inmaterial: fonte pa la creación d’un imaxineriu audiovisual asturianu'. El miércoles 9, mentes, va celebrase una Nueche en Danza.

Na semeya, Fernández Iglesias, García Cuetos, Galán y Valdés na inauguración de la XIII UABRA.