La rellación de les campeones del ḥoquei, el Telecable Xixón, cola llingua asturiana

El club de La Calzada siempre foi mui respetuosu pa col idioma, tamién presente na equipación de les ganadores de la Intercontinental na población de San Juan.

Foi nel 2018 cuando la Oficina de Normalización Llingüística de Xixón asoleyaba 'El Pallabreru del Ḥoquei Patinos', dientro d'una serie dedicada a deportes, na que munchu tuvo que ver el Solimar –entós Hostelcur y agora Telecable por motivos de patrociniu–, club siempre respeutosu pa cola cola llingua asturiana que lluz el logu de la ciudá col topónimu asturianu 'Xixón' nel pantalón. Foi Xuan Ramón Naves, presidente de la entidá per 16 años, hasta'l final de la temporada 2017-2018, l'encargáu de la so ellaboración por encargu del SNL xixonés.

Acababen les de La Calzada de ganar la Copa d'Europa y la Lliga cola capitana Sara Lolo, autora del prólogu, na plantía, tamién presente ayeri nel Aldo Cantoni de la población arxentina de San Juan na victoria de la final de la Intercontinental nos penaltis contra les catalanes del Generali Palau de Plegamans. La primer Intercontinental del equipu xixonés y únicu títulu que-y quedaba por ganar.

Ye posible consultar y descargar el 'El Pallabreru del Ḥoquei Patinos' nesti enllaz.