¡Son les meyores! El Telecable Xixón trai d'Arxentina l'únicu títulu que-y faltaba

El Telecable Xixón de ḥoquei patinos femenín completó en tierres arxentines un fitu históricu pal deporte asturianu: 5 copes de 5 posibles.

Depués de raspiar la Intercontinental na primer edición del 2018, les de La Calzada consiguieron desquitase na segunda oportunidá y trayer per primer vegada a Europa esti títulu, l’únicu que-y faltaba. D’esta forma’l Solimar, Telecable por razones de patrociniu, engancha de siguío Supercopa, WSE Champions League –que-y dio plaza pa la final a cuatro d’Arxentina esta temporada–, Copa y OK Lliga, amás de la Supercopa tamién de la 23-24.

L’equipu xixonés, agora con Natasha Lee nel bancu, superó al anfitrión Aberastain na semifinal del vienres por un contundente 4-0, clasificando pa la final del domingu, a la que llegaría’l Generali Palau de Plegamans, que’l sábadu ganaba por 3-2 al Andes Talleres. D’esta manera reeditábase, agora na población argentina de San Juan, la final europea.

Nun defraudó’l choque ente asturianes y catalanes, que llegaría a la prórroga depués d’una igualada a 3 tantos nel tiempu reglamentariu: 1-0, 1-1, 2-1 (descansu), 3-2 y 3-3. Nun habría goles nel tiempu adicional y el títulu iba a una emocionante tanda de penaltis na que la portuguesa Ana Catarina marcaría’l decisivu llueu d’un error de Busquets, con parada de Fernanda Hidalgo, antecedíu por una anotación clave de Nuria Almedia.

Allegría nel cuadru de La Calzada nel Aldo Cantoni, espectacular pabellón con un aforu de 8.000 espectadores, y ente los siguidores asturianos presentes na grada con banderes del país, que trai a Asturies la Intercontinental, convirtiéndose asina nel primer club européu n’algamala. Hasta agora namás poseía esti campeonatu otru equipu de San Juan, el Concepción (4-2 al Telecable).

Títulu númberu 18

Ésti ye’l decimoctavu títulu oficial que gana’l Telecable, qu’acumula 6 copes d’Europa, 4 lligues, 5 copes y 2 supercopes. L’afición yá espera la llegada mañana de les xugadores y cuerpu téunicu pa celebrar l’Intercontinental peles cais de Xixón.