González Orejas anuncia la incorporación “gradual” del asturianu nos informativos de TPA

“Nel plazu de tiempu más curtiu posible, nun digo selmanes, pero sí meses, mui pronto, pue haber información diaria y selmanal en llingua asturiana” nos informativos de TPA, anunció Francisco González Orejas, direutor xeneral en funciones de RTPA. D’esta forma l’ente va facer cumplimientu de la propuesta de resolución presentada por Podemos sobre la presencia del idioma nel ente aprobada pola Xunta Xeneral nel Alderique d’Orientación Política Xeneral celebráu'l mes pasáu.

Na mesma, presentada por Podemos y apoyada pola Federación Socialista Asturiana (FSA-PSOE), Partido Popular (PP), Asturies pela Izquierda (IX-IAS) y el diputáu de Foro, Pumares –votaron en contra Ciudadanos y VOX, y astuviéronse Pedro Leal y Luis Armando Fernández Bartólome–, encamentábase al Conseyu de Gobiernu a “tomar toles midíes necesaries pa garantizar la presencia de les llingües propies d’Asturies na programación de la RTPA, con un tratamiento dignu, global y permanente”. “Nos dos conseyos d’alministración últimos falóse d’esto”, apuntó güei González Orejas na Comisión de Presidencia a una entruga del diputáu moráu Rafael Palacios, considerando que por dignu “ye que tenga un tratamientu dignificáu y entendemos, anque pue haber opiniones que nun tea enteramente d’alcuerdu, que nos programes s’utiliza de forma digna l’asturianu”, y por global y permanente “que se trataba de los informativos”.

“Tamos iniciando’l procesu pa ver de qué manera, cuál ye’l procedimientu más afayadizu, pa que nel plazu de tiempu más curtiu posible nun digo selmanes, pero sí meses, mui pronto, pue haber información diaria y selmanal en llingua asturiana”, siguió’l direutor del ente públicu de comunicación, que rescampló que’l problema ta en que “cuando se creó la RTPA nun se pidió ente los requisitos a los redautores el conocimientu de la llingua asturiana. Ye ún de los handicap que tenemos: nun disponemos de trabayadores que tengan un conocimientu afayadizu”. Pa finar especificó que “tamos viendo cómo podemos integrar de forma gradual les llingües d’Asturies pa que’l tratamientu siga siendo dignu, y global y permanente”.

Na semeya, Fernández Orejas y la conseyera Rita Camblor.