La obra 'La neña de les trences del revés' abre en Xixón el festival Escenines pa la Reciella

Completen el programa 'Ágada, guardiana de la viesca' y 'Cuidáu coles palabres'. Toles funciones, a les 19 hores, son con entrada llibre.

El festival navidiegu Escenines pa la Reciella yá ta equí. Dende güei y hasta'l vienres van representase trés obres nel patiu del Centru de Cultura Antiguu Institutu, que tolos años s'enllena de neñes y neños pa disfrutar d'espectáculos n'asturianu nesti periodu vacacional.

La primer cita va ser esta tarde con 'La neña de les trences del revés', una perguapa historia d'Iris Díaz Trancho recomendada pa mayores de 3 años que pon n'escena El Callejón del Gato. Ésta cuenta la historia de cómo les neñes Thana y Deva, que viven lloñe una d’otra, en Mali y n'Asturies, pero que nun son mui distintes, pueden conocese y falar nuna nueche al traviés de la Lluna, que fai d'espeyu máxicu.

Mañana va ser el turnu de Teatro del Cuervo, que lleva al festival 'Ágada, guardiana de la viesca', y el vienres, últimu día, de Guayominí Producciones, que presenta 'Cuidáu coles palabres', entrambes pa tolos públicos. 'Reciella. Families pol Asturianu', organizador del festival cola collaboración del Conceyu y el Gobiernu al traviés del ciclu 'Asturies, Cultura en Rede', encamienta a llegar con antelación, yá que cuando se complete l'aforu yá nun se va permitir l'accesu de públicu.