La segunda xornada d'Escenines pa la Reciella trai mitoloxía y lleendes

Va representase 'Ágada, guardiana de la viesca'.

El festival navidiegu d'espectáculos n'asturianu Escenines pa la Reciella vive esta tarde la so segunda xornada. Teatro del Cuervo va representar dende les 19 hores nel patiu del Antiguu Institutu una obra apta pa toles edaes qu'axunta mitoloxía, lleendes y secretos.

Ágada ye una habitante de la viesca a la que-y nomaron va poco guardiana de la mesma, pero yá nun pue más y convoca un conceyu con tolos seres mitolóxicos. Éstos, procedentes de tolos requexos d'Asturies, son los que-y cuenten histories que'l públicu va poder conocer.

La entrada a la función ye de baldre, anque 'Reciella. Families pol Asturianu', qu'entama esta iniciativa cola collaboración del Conceyu y el Gobiernu al traviés del ciclu 'Asturies, Cultura en Rede', encamienta a llegar con antelación énte la previsión d'enllenu. Escenines pa la Reciella va siguir mañana con 'Cuidáu coles palabres', de Guayominí Producciones.