Escenines pa la Reciella trai pa esta Navidá trés obres de teatru

El patiu del xixonés Centru de Cultura Antiguu Institutu repite como escenariu del festival.

Avérase la Navidá y, con ella, torna'l Festival Escenines pa la Reciella qu'entama 'Reciella. Families pol Asturianu' col sofitu del Conceyu de Xixón y del proyeutu 'Asturies, Cultura en Rede' del Gobiernu. Del 27 al 29 d'avientu van programase trés obres de teatru en llingua asturiana pa neñes y neños, siempre a les 19 hores, con entrada llibre hasta completar aforu.

La primera en representanse va ser 'La neña de les trences del revés', una historia d'Iris Díaz Trancho pa mayores de 3 años adaptada al teatru por El Callejón del Gato. Al día siguente, el xueves 28, Teatro del Cuervo va poner n'escena 'Ágada, guardiana de la viesca', pa poner el ramu al festival Guayominí Producciones, con 'Cuidáu coles palabres', entrambes encamentaes pa tolos públicos.