IX nun abandona la negociación de la reforma del Estatutu si se desvenceya de lo fiscal

Esta postura fadría posible aprobar una propuesta fiscal colos votos de la FSA, Podemos y Foro, y la reforma estatutaria sumando los d'Izquierda Xunida (IX), que s'opón a una rebaxa d'impuestos. La pelota quedaría entós nel partíu qu'ocupa'l Gobiernu, que nun paez tar dispuestu a aceptar esta fórmula mesta.

IX desmárcase de la propuesta fiscal de Podemos, aceptada por Foro como puntu d’entamu pa retomar la negociación de la reforma estatutaria, al tocar rayes coloraes pa la coalición, pero nun abandona la mesa siempre que la oficialidá se desvenceye de los tributos. "Yá hai una mayoría, probablemente, parllamentaria que puede reformar a la baxa los impuestos n'Asturies. Nós vamos oponenos siempres a eso; una rebaxa de los impuestos siempres a les rentes más altes va cuntar cola oposición d'IX", espresaba esta fin de selmana el so secretariu d'Estratexa Política, Alejandro Suárez, presente nes negociaciones desendolcaes el mes pasáu.

Esta posición sigue siendo nestos momentos la oficial del partíu, qu'entiende que les otres trés fuercies sumen 25 votos, suficientes pa sacar alantre modificaciones fiscales na Xunta Xeneral, y que les dos cuestiones han separtase p’avanzar hacia la oficialidá. Sicasí, Adrián Barbón vien insistiendo estos díes na postura qu'adoptó al conocer les demandes d'Adrián Pumares: "tamos dispuestos a tou, a alcordar lo que sía, siempre y cuando sía frutu del alcuerdu de los cuatro partíos que quieren sumar la oficialidá", espresó en concreto'l xueves, mesma idea qu'espresó esta mañana en Santander.

De lo qu'asoceda na Comisión Executiva de la FSA de mañana, na que los socialistes van analizar l'escenariu nuevu de la negociación, dependerá muncho'l futuru que tenga la reforma estatutaria. IX, mentes, cuenta con guardar silenciu hasta'l vienres, cuando tien n'axenda evaluar la situación al traviés del so coordinador xeneral, Ovidio Zapico.

Na semeya, Víctor Suárez y Alejandro Suárez, representantes d'IX na mesa de negociación, na primer xunta celebrada en xineru.