“El paisaxe d’Asturies ye como ye pola intervención humana per munchos sieglos”, apunta Rubiera

La Fundación Almastur entama les primeres Xornaes sobre’l Procesu Antrópicu d’Asturies baxo’l títulu ‘La construcción del paisaxe asturianu’. Ástur Paredes y Xuan Pedrayes van protagonizar dos sábados d'una actividá que cuestiona "esa idea de qu'Asturies ye un paraísu natural".

“Tamos sintiendo nes últimes décades un mitu como quién diz, que ye ‘Asturies, paraísu natural’. Y Asturies, el paisaxe asturianu, nun ye natural en realidá, ye’l resultáu d’un procesu mui llargu d’intervención humana. Eso ye lo que se llama’l procesu antrópicu, d’humanización del territoriu”, esplica Carlos Rubiera, presidente del Patronatu de la Fundación Almastur, qu’entama esta actividá dientro de la so idea d’Escuela de la Cultura Asturiana que quier desenvolver en Caldones.

Con estes xornaes trata “precisamente de dalguna manera poner en cuestión esa idea que se ta popularizando de qu’Asturies ye un paraísu natural. Nun lo ye, como digo; el nuesu paisaxe ye’l resultáu de la intervención humana. Asturies, el nuesu paisaxe, ye como ye pola intervención humana a lo llargo de munchos sieglos”.

Baxo’l nome de ‘La construcción del paisaxe asturianu’ van celebrase estes primeres Xornaes sobre’l Procesu Antrópicu d’Asturies, dividíes en dos xornaes. La primera va tener llugar esti sábadu, centrada na temática ‘La fomación de les aldees’.

Nella l’etnógrafu Paredes va poner en primer llugar la intervención ‘Del castru a la villa/aldea del sieglu XI’ (de 10 a 11.45 hores) y, llueu d’una posa, ‘La evolución de l’aldea’ (de 12.15 a 14 hores). “Terminando les xornaes pasamos al llagar, onde facemos una espicha y siguimos charlando”, señala xixonés.

La segunda sesión va ser el 1 de xunu col nome ‘Les brañes y l’habitat vaqueiru’. Va encargase nesta ocasión el doctor arquiteutu Pedrayes, que va dividila en ‘Na llende l’aldea: les brañes’ y en ‘Hábitat vaqueiru’.

Divulgación pa tolos públicos

“Tanto Ástur Paredes como Xuan Pedrayes son xente mui preparao que lleven munchísimu tiempu precisamente estudiando estos temes y amás son apasionaos d’ellos. Contacté con ellos con esa idea de que pudiesen ufiertar una esposición mui documentada visualmente sobre esti procesu antrópicu, esta construcción histórica del paisaxe asturianu”, espresa Rubiera.

Les intervenciones tán plantegaes como de “divulgación pa tolos públicos, ensin perder el rigor intelectual y un enfoque universitariu”. “Pue interesa-y a cualquier persona que tenga interés en conocer a fondu’l nuesu país, cómo ye y por qué ye, y cómo ye que ye como ye, lo que paez una redundancia, pero ye asina”, esplica Rubiera, que considera que son atractives p’aquelles persones “que tengan un interés más técnicu, como universitarios, xeógrafos, historiadores, xente interesao en cuestiones etnográfiques...”, y pa “xente de la cai interesada en conocer estos aspectos con unes ponencies que son mui didáctiques y mui visuales”.

P’asistir a la primer sesión hai que confirmar la matrícula enantes del vienres, mentes que pa la segunda’l plazu fina tamién la xornada previa. El preciu de cáun d’elles ye de 30 euros, de 50 si s’asiste a les dos, y inclúi la espicha nel llagar asitiáu baxo la sala Almastur de Garbelles de Baxo, onde van desenvolvese les xornaes.

La talla tradicional de madera, permanente

Este xornaes enmárquense “nesa idea de la Escuela de la Cultura Asturiana que dirá avanzando nel tiempu con actividaes mui diverses, tou aquello que, per un llau, vaya demandando la xente, y pel otru, vaya cuadrando”. La primera foi’l cursu de talla tradicional en madera qu’arrancó en payares y finó a lo primero d’esti mes, “que tendrá una segunda edición en payares. Va ser una actividá permanente de la Fundación Almastur”, confirmó Rubiera.

El cantante tamién trabaya na idea “d’entamar un ciclu d’actividaes lliterario-musicales, entrevistes a escritores relevantes n’asturianu que taríen amenizaes con lletres musicales intercalaes y un final musical”. Esta iniciativa, sicasí, ta entovía nun estáu mui primariu.

Na semeya, Rubiera na entrada de la sala Almastur.