Kuss sal d'Asturies como líder de La Vuelta

El corredor estauxunidense del Jumbo-Visma, cerca de ganar su primer gran vuelta.

Tuvo'l so momentu críticu en L'Angliru, cuando los sos compañeros d'equipu Vingegaard y Roglič tiraron p'alantre nel tramu final de la xuba, pero'l maillot coloráu de La Vuelta consiguió resistir en soledá y caltener 8 segundos col danés. Foi una situación que soprendió al pelotón y a aficionaos, entregaos a Sepp Kuss, ciclista qu'hasta agora tenía un papel de gregariu, el de trabayar pa los líderes, pero que ta a poques pedalaes d'algamar el mayor ésitu deportivu de la so carrera.

La competencia amosada pol Jumbo-Visma'l miércoles en Riosa nun se repitió ayeri nel puertu La Cruz de Llinares, onde hebo respetu al primeru de la xeneral. Inclusive, l'estuaxunidense sacó ventaya na cume a Vingegaard, agora a 17 segundos.

Kuss tien per delantre una única etapa peligrosa, la de mañana enten Manzanares El Real y Guadarrama, con dellos pasos de tercer categoría, mentes que s'espera tranquilidá na de güei, ente La Bañeza y Íscar. El domingu La Vuelta va finar cola so llegada a Madrid.

Gran ambiente nes carreteres asturianes

Asturies vivió un gran ambiente ciclista nes dos etapes que pasaron peles carreteres asturianes, dexando increíbles imáxenes per televisión, sobre manera ayeri, cuando'l sol acompañó nel puertu La Cruz de Llinares. No deportivo, la victoria en L'Angliru foi pa Roglič, mentes que na xornada con final inéditu en La Vuelta dio una exhibición el belga Remco Evenepoel (Soudal Quick-Step), ensin opciones na xeneral, que llegó al altu en solitariu y sacó 4 minutos y 44 segundos al segundu clasificáu, l'italianu Damiano Caruso (Bahrain Victorious).

Na semeya, el grupu de cabeza na etapa d'ayeri al so pasu per Albariza, en Miranda.