La Vuelta dexa d’emplegar la toponimia oficial n’Asturies

‘Infiesto’ y ‘Luanco’ son les dos salíes d’etapa que va tener La Vuelta del 2024 n’Asturies y non 'Infiesto/L'Infiestu' nin 'Lluanco/Luanco'. Depués d’unos años respetando la toponimia asturiana, única oficial, esta edición de la carrera ciclista torna a emplegar nel llibru de ruta nomes de llugar derogaos, dalgo que nun asocede cola gallega nin vasca.

El Madrid Marriott Auditórium Hotel acoyó ayeri la gala de presentación del percorríu de La Vuelta 2024, competición na qu’Asturies siempre ye protagonista. Por esti motivo munchos yeren los güeyos que taben pendientes por conocer qué finales d’etapa programaba Unipublic esta ocasión.

El Cuitunigru y Los Llagos son los altos escoyíos pa dar espectáculu na selmana final de la carrera, con salíes inédites en L’Infiestu y Lluanco, el 1 y el 3 de setiembre, de manera respeutiva, con descansu’l 2 y un pequeñu pasu per Asturies el 30 d’agostu per Zarréu y Ḷḷeitariegos nuna xornada con final en Villablino. Una bona noticia pa los aficionaos asturianos que choca con un pasu atrás nel respetu a la toponimia asturiana, única oficial en 74 de los 78 conceyos del país.

Si l’añu pasáu, al igual que los anteriores, apaecía nel llibru de ruta Les Arriondes/Las Arriondas, Belmonte/Balmonte y precisamente Infiesto/L’Infiestu, anque con dalgún qu’otru error como ‘Las Caldes’ pol oficial Les Caldes o ‘Entrago’ por Entragu, nesta ocasión asocede al revés. Casos como’l de ‘Gijón’ (y non Gijón/Xixón) y ‘Langreo’ (y non Llangréu/Langreo), amás de les dos salíes citaes, son la norma nos percorríos d'etapa presentaos pola organización, cola esceición única de Figareo y Lloroñi, pa les que nun empleguen los derogaos ‘Figaredo’ y ‘Loroñe’.

Esta situación nun asocede nel pasu del pelotón per Galicia y Euskadi. Baiona, Castro Caldelas, Vitoria-Gasteiz y Maeztu, por citar dellos, son los qu’apaecen.

Salida de Turismu de Cultura

La salida de la Viceconseyería de Turismu –que ye’l departamentu que s’encarga de negociar con Unipublic– de la Conseyería de Cultura, Política Llingüística y Turismu de Berta Piñán pa incluyise na Conseyería de Presidencia, Retu Demográficu, Igualdá y Turismu de Gimena Llamedo, creándose una viceconseyería de Cultura, Política Llingüística y Deporte dependiente direutamente del presidente Adrián Barbón, podría esplicar esta situación, dau l’enfotu de la conseyera anterior con esta cuestión. Lara María Martínez Fernández, presente ayeri en Madrid, sutituyó a Graciela Blanco al frente de la citada viceconseyería.

Na imaxe, percorríu de la etapa 16 ente Lluanco y Los Llagos.