La Vuelta llega a Asturies cola mirada puesta na competencia dientro del Jumbo-Visma

L'equipu neerlandés ocupa los trés primeros puestos na xeneral y la espectación ta en quién va salir líder de les etapes de L'Angliru y el debutante puertu La Cruz de Llinares.

Kuss, Vingegaard y Roglič. Ún de los trés, sacante una sorpresa de grandes dimensiones, va partir el vienres de La Bañeza col maillot coloráu de La Vuelta depués de pasar les dos etapes asturianes de la carrera.

L'estauxunidense ye'l que lu caltién anguaño, pero'l danés dio un pasu pa quita-ylu al so compañeru ayeri en Cantabria, quedando a 29 segundos na xeneral. L'eslovenu ta agora terceru, a 1 minutu y 33 segundos.

El cuartu asitiáse a 2 minutos y 33 segundo, Juan Ayuso (UAE Team Emirates), polo que les miraes van centrase na competencia ente los trés Jumbo-Visma. Les rellaciones ente ellos paecen ser bones, anque dende l'entornu de Roglič amosóse ayeri disconformidá énte'l proceder de Vingegaard y la táutica del equipu.

Salida de Ribeseya

El pelotón tomó salida de Ribeseya, que s'estrena como puntu d'entamu d'etapa, a les 13.58 hores –neutralizada a les 13.44 hores– pa tomar direición contra L'Angliru xubiendo La Coḷḷadieḷḷa y l'Alto la Segá, pasos entrambos de primer categoría. En Riosa, onde hai un gran ambiente, va vivise otra gran tarde de ciclismu nuna xuba icónica con repercusión mundial que los ciclistes van entamar a les 16.58 hores na meyor de les previsiones y a les 17.20 na más lenta.

Mañana la xornada va arrancar en La Puela pa dirixise contra'l puertu La Cruz de Llinares, otru descubrimientu pa La Vuelta. La Veiga las Estacas (segunda categoría), San Ḷḷourienzu (primera) y Tenebréu (tercera) son los otros puertos importantes de la etapa.

Na semeya, el Jumbo-Visma esta mañana en Ribeseya.