José Ángel Gayol gana’l Premiu Xosefa Xovellanos de novela n’asturianu cola obra 'La cafiante muerte de Nicolai Bostov'

El xuráu destaca la calidá y la naturalidá del rexistru llingüísticu y el ritmu narrativu de “una sátira mui llograda de la sociedá asturiana de finales del sieglu XX”.

La obra 'La cafiante muerte de Nicolai Bostov', del escritor José Ángel Gayol foi la ganadora del XLII Premiu Xosefa Xovellanos de novela n’asturianu. El gallardón, convocáu y concedíu pola Conseyería de Cultura, Política Llingüística y Turismu dientro los Premios Lliterarios, tien una dotación de 6.000 euros.

Los miembros del xuráu destacaron que la obra de José Ángel Gayol “ye una sátira social con un ritmu narrativu bien llográu que retrata la sociedá asturiana de finales del sieglu XX con humor esperpéntico, y too ello espresao con un rexistru llingüísticu de muncha calidá y naturalidá”.

El xuráu encargáu de valorar los trabayos, reuníu baxo la presidencia del director xeneral de Política Llingüística, Antón García, tuvo formáu por les escritores Pilar Arnaldo y Marta Mori, la llibrera Natalia González, el filólogu Marcos Martínez, y Sidoro Villa, maestro, escritor y ganador de la anterior edición del Xosefa Xovellanos. Laura Marcos, filóloga del serviciu de la Direcciòn Xeneral de Política Llingüística, actuó como secretaria.

José Ángel Gayol (Mieres, 1977) ye escritor y críticu lliterariu. Llicenciáu en Derechu y n’Antropología Social y Cultural, y Máster n’Historia y Análisis Sociocultural, ye autor d’otres dos noveles, cinco poemarios,  trés ensayos y un volume de diarios. Con 'El llibru de les coses misterioses' (2013) foi ganador del Xuan María Acebal de Poesía, y sus ensayos 'Vértigu. L’Atracción del abismu na sociedá contemporánea' (2015) y 'El silenciu invisible' (2019) foron gallardonados col Máximo Fuertes Acevedo. Gayol llogró tamién el Premiu de la Crítica de narrativa n’asturiano en 2020 cola obra 'En primera persona'.