‘El viaxe del cacique’, de Gonzalo G. Barreñada, algama’l XLIII Premiu Xosefa Xovellanos

Un rellatu históricu con elementos de los llibros de caballeríes foi merecedor del XLIII Premiu Xosefa Xovellanos de novela con 'El viaxe del cacique'. El so autor ye Gonzalo González Barreñada, que yá ganara ún de los Premios Lliterarios de la conseyería nel añu 2019, en concreto’l l XXV Premiu Xuan María Acebal de poesía con ‘El llar n’orde’.

L’acta del xuráu rescampla d’esti títulu la “solidez del testu y el gran procuru formal qu'ayuda al desenvolvimientu esitosu de los personaxes”. Encargáronse d’escoyer la obra ganadora, ente los siete aspirantes al gallardón que cuenta con 6.000 euros de recompensa, la escritora Laura Rodríguez Solís; la llibrera y tamién escritora Natalia González Menéndez; el filólogu y trabayador de l’Academia de la Llingua Asturiana, Marcos Martínez Fernández; la profesora Liliana Díaz Gómez; y José Ángel Gayol, autor que llevó’l premiu l’añu pasáu pol 'La cafiante muerte de Nicolai Bostov', faciendo’l llabor de presidente Antón García, direutor xeneral de Política Llingüística, y Lourdes Álvarez, secretaria filóloga adscrita a la Direición Xeneral, de secretaria.

Nacíu en Sotrondio nel 1973, González Barreñada ye llicenciáu en Xeografía y Historia, especializáu n’Historia del Arte. La so obra más reconocida ye ‘El llar n’orde’, poemariu que llevó’l Xuan María Acebal de los Premios Lliterarios qu’entrega la Conseyería de Cultura, Política Llingüística y Turismu, y el XXI Premiu de la Crítica de l’Asociación d’Escritores d’Asturies na estaya de poesía como’l meyor de los espublizaos nel 2020, anque tien asoleyaos otros munchos títulos de nivel como ‘Biografíes’, ‘La casa de Xuan Buelga’, ‘Hestories de Burgundu’, ‘Hestoria ensin contar’ y ‘El pesu de la lluz’.

Queden dos por fallase

El Xosefa Xovellanos ye’l quintu de los siete Premios Lliterarios en fallase, polo que queden por conocer los ganadores del XV Premiu María Josefa Canellada de lliteratura infantil y xuvenil, y del II Premiu Florina Alías a la meyor traducción. El primeru, en xunetu, foi’l XIV Premiu Alfonso Iglesias de cómic, que ganó Guillermo Menéndez Quirós con ‘Ana María. La Llobera d’Asturies’, y selmanes depués comunicóse’l XXVIII Premiu Xuan María Acebal de poesía, que foi pa Marta Mori por ‘Los carreros del tiempu’, mentes qu’esti mes diose a conocer el II Premiu Enriqueta González Rubín de narrativa moza, que foi p’Andrés Fernández Menéndez por ‘1929’, y el XVIII Premiu Máximo Fuertes Acevedo d'ensayu, que recibió Damián Barreiro por ‘Asturianía kitsch: decálogu de la cultura pop ástur’.