Iniciatival pol Asturianu reclama un Plan de Normalización

Llueu d'aconceyar con Podemos prepara alcuentros cola FSA y Foro dientro d'una ronda con tolos partíos de cara al 28-M.

L’aconceyamientu con Podemos nel Conseyu de Mocedá de Xixón foi’l primeru d’Iniciativa pol Asturianu coles formaciones polítiques “pa tresllada-yos les nuestres preocupaciones y les nuestres propuestes pa incluyiles nel programa eleutoral”. “Falamos con Foro pa venos y tuvimos un conceyu previu cola FSA al que va siguir un segundu, pero ésti con Podemos ye’l primeru como tal”, rellató a Asturies.com el so presidente, Iván Llera, que xunto a Xuan Pandiella recibió esta tarde a Cova Tomé, Xune Elipe y Laura Tuero, les trés persones qu'ocupen los primeros puestos de la llista de la fomación morada nes eleiciones.

Nestos alcuentros “la principal reivindicación que llevamos ye la oficialidá, que nesti casu ye una cuestión que Podemos tien asumida, pero si queríamos llevar dalgunes propuestes o treslladar cuáles son les cuestiones más importantes pa nosotros de cara a la ellaboración del programa eleutoral y esperar que la próxima llexislatura sía la de la oficialidá”. “Hai qu’intentar avanzar pa sumar 27 diputaos o los más posibles de los más partíos posibles na próxima llexislatura, siguir trabayado nesa llinia, y mientres tanto dir avanzando n’otres cuestiones qu’entendemos que tamién son importantes”.

Ente elles tán cuestiones venceyaes a la educación como “la especialidá docente o qu’haya asturianu en toles etapes educatives”, pero tamién “que s’incluya l’asturianu con toa normalidá dientro la RTPA” o “que la Conseyería de Política Llingüística, nesti casu, cuente con un Plan de Normalización que nos permita siguir el trabayu del Gobiernu y poder dir entrugando-y poles coses que nun se tán faciendo bien y les que sí se tán faciendo bien valorales tamién”, una demanda que pa Iniciativa pol Asturianu “ye fundamental”.

Na semeya, Llera, Pandiella, Tomé, Tuero y Elipe.