Elipe defende la creación d’un Institutu de Desarrollu de les Industries Culturales n’Asturies

“La política llingüística d’esti Gobiernu foi d’inercia”, apuntó Xune Elipe, que demanda una xestión “que realmente tenga beneficios sociales, económicos y aumente’l numberu de falantes”. El númberu 2 de la candidatura de Podemos, que defende la creación d’ Institutu de Desarrollu de les Industries Culturales n’Asturies, acompañó a Cova Tomé y Laura Tuero nuna xunta con Iniciativa pol Asturianu.

Iván Llera, presidente del coleutivu, y Xuan Pandiella recibieron esta tarde a los representantes de la formación morada nel Conseyu de Mocedá de Xixón, onde aconceyaron per más d’una hora. Una xunta na que treslladaron el so puntu de vista sobre la situación llingüística y intercambiaron paeceres nun bon ambiente.

A la salida, Elipe señaló que “la llexislatura que ta a piques d’acabar foi una llexislatura vacía en cuantes al tema llingüísticu, y non sólo pol fiascu tremendu que supunxo’l nun llegar a un alcuerdu pa la reforma del Estatutu onde s’incluyera la reconocencia de los derechos llingüísticos de los asturianos y asturianes cola oficialidá, que creo que ye ún de los grandes fracasos, sinón el que más, del Gobiernu actual d’Asturies”. El cantante llamentó que la FSA “nun punxo tola carne nel asador cuando de verdá debería aprovechar una oportunidá histórica como que la se produció nesta llexislatura y que, esperemos que non, pero too pinta en que va tardar tiempu en que se pueda producir esa mesma oportunidá. El nun ver con esa perspectiva histórica lo que suponía’l tener 27 diputaos en principio favorables a la oficialidá y apostar hasta l’últimu minutu por que se reformara l’Estatutu creo que ye ún de los debe más importante, y que va pesar sobre esti Gobiernu y el que lu dirixe, el señor Barbón”.

Tampoco nun ta satisfechu cola política llingüística del Executivu socialista. “Foi una llexislatura vacía porque nel campu del avance real de la normalización llingüística tampoco hubo cenciellamente grandes pasos. Foi una política llingüística d’inercia: sigue un movimientu que vien dende hai años, siguen convocándose premios, siguen faciendo dalguna cosuca, dalguna campañina, pero ye esactamente lo mesmo que venimos viendo dende hai décades n’Asturies, ensin realmente nengún avance importante. Creemos que yá ye hora que los gobiernos asturianos apuesten poles singularidaes propies y conviertan esa singularidá del país en beneficiu económicu y social”.

Nesi sen, rescampló que “l’oxetivu ye la oficialidá, pero mentanto nun se llogra esa oficialidá lo único que cabe facer ye una política llingüística afayadiza y que realmente tenga beneficios sociales, económicos y qu’aumente’l númberu de falantes”. Tamién defendió la creación “d’un órganu específicu de la industria cultura, una axencia, un institutu, de desarrollu de les industries culturales n’Asturies que faiga d’abellugu a tola creatividá cultural, a tol emprendimientu cultural qu’hai n’Asturies, y qu’abarque la música, la cultura, el folclor, la llingua…”.

Una institución que “produza tamién unes sinerxes ente les pymes del sector pa que puedan llegar a convertir toa esa creatividá realmente en beneficiu económicu. Qu’esa tan cacarexada llucha, guerra, contra la burocracia, qu’afecta directamente a toes eses pequeñes, medianes empreses y autónomos que trabayen cola cultura y la llingua asturiana, s’amenorgue, se racionalice”, reclamó al tiempu que confirmó que la creación d’esti institutu “va ser una de les grandes apuestes que vamos facer de cara a les próximes elecciones”.