El III Seminariu ‘Oficialidá’ va dar a conocer modelos d’otros territorios y va afondar en polítiques de normalización

|
II Seminariu 'Oficialidá'

Iniciativa pol Asturianu ta trabayando en zarrar la participación pal III Seminariu ‘Oficialidá, el camín constitucional pal futuru del asturianu’, que va celebrar el 21 y 22 d’abril nel Aula Magna de la Universidá d’Uviéu. Responsables de política llingüística d’otros territorios van intervenir nesta cita que pretende dar a conocer modelos d’oficialidá.

Depués de les ediciones del 2018 y del 2019, la organización que trabaya pola normalización del idioma recupera esti formatu con convidaos de sonadía nos sos ámbitos y que tan bon sabor de boca dexo tanto ente los entamadores como nos participantes. La pandemia de COVID-19 dexó aparcada la fórmula, optando nel 2021, nel momentu de l’apertura de les negociaciones pa la reforma del Estatutu d’Autonomía, por un alderique de formatu reducíu con representantes de tolos grupos parllamentarios –a esceición de VOX al ser conocida la so postura–, pero agora n’otru momentu importante, coles eleiciones de mayu nel horizonte y la oficialidá otra vuelta nel centru del debate, considera afayadizu retomar el seminariu.

Va ser el más llargu de los trés, con programa de vienres de tarde y de sábadu pela mañana y pela tarde, cola presencia de convidaos de dientro y fuera d’Asturies. La intención principal ye plantegar modelos d’oficialidá y de consensu, y conocer otres realidaes d’otros territorios y la so esperiencia, pa lo que se contautó con responsables y persones qu’ocupen cargos de política llingüística n’otres autonomíes.

Tamién va ponese el focu n’Asturies, n’analizar la situación actual y ver les coses pendientes. Asina va afondase na necesaria declaración d’oficialidá, nel so desendolcu y tamién nel de polítiques de normalización llingüística.

Dende Iniciativa pol Asturianu entienden que nel marcu actual pue avanzase muncho más de lo que se ta faciendo y que, nel casu d’algamar los 27 votos necesarios pa reformar l’Estatutu d’Autonomía, hasta que se cumpla tol procesu en Madrid pueden pasar un par d’años que nun se deberíen perder. Asina, como yá declarara recién el presidente Iván Llera llueu d’un alcuentru colos candidatos de Podemos, considera fundamental un Plan de Normalización dende l’entamu de la llexislatura que permita desarrollar al máximu la Llei de Promoción y Usu del Bable/asturiano.

Na semeya, un momentu de la charra 'El llabor de los servicios de normalización llingüística como esperiencia pa la oficialidá' nel II Seminariu ‘Oficialidá, el camín constitucional pal futuru del asturianu’.

Contador Estadistiques