La Conseyería d’Educación nun acepta’l so propiu títulu de C1 d’asturianu col argumentu de que “no es idioma oficial”

Una profesora de Secundaria, Liliana Díaz, vio desestimáu’l so títulu de C1 d’asturianu como méritu nel concursu de tresllaos col argumentu de que “la lengua Asturiana no es idioma oficial”. Dase’l casu de que ye la propia Conseyería d’Educación la qu’entama y entrega esta certificación adaptada al Marcu Común Européu de Referencia pa les Llingües.

“Nun-y da valor nengún. Pue considerase como una estafa porque pagues 31 euros por un títulu que llueu nun val pa nada”, denuncia la docente, que califica la situación de “kafkiana”. Ella presentó’l so títulu de nivel C1, el más altu, de certificación de Llingua Asturiana, xunto’l col C1 d’inglés pa dichu concursu de tresllaos, atopando que “na baremación provisional contaron namás con ún de los dos, ensin especificar cuál, anque yo yá sospechaba que sería’l d’asturianu”, esplica.

Nun yera l’únicu casu, dalgo que denunció Iniciativa pol Asturianu, que facilitó un escritu d’alegación pa los perxudicaos. Díaz recibió nesti casu la respuesta “no estimada. Lengua no oficial”.

Col fallu definitivu abrióse un plazu d’alegaciones nuevu. “Les bases nun ponen que tenga que ser llingua oficial. L’inglés mesmamente nun ye llingua oficial”, esplica, y ésti foi l’argumentu qu’emplegó la profesora nesta ocasión.

La respuesta, sicasí, foi nel mesmu sentíu: “Desestimado. La lengua Asturiana no es idioma oficial”. Al empar, la Conseyería d’Educación aceptaba, como se pue ver nel cuadru qu’acompaña a esta información, un certificáu en catalán, en gallegu y en valenciano, amás d’incluyir una resolución que diz “Estimado. Aceptación habitilitación en lengua vernácula”.

“Voi llegar hasta’l final”

Díaz acabaría renunciando al treslláu a nun algamar el destín deseáu por unes poques décimes, polo qu’amás de la inxusticia vivida por esta situación vese perxudicada dafechu pola decisión de la conseyería. Una situación que tamién vivieron dellos maestros y maestres de Primaria que, sicasí, nun se dio nel casu de direutores de centru, onde sí se tuvieron en cuenta los títulos d’asturianu como méritu.

La intención de la profesora de Secundaria ye, depués de consultar colos abogaos de Comisiones Obreres (CC OO), “llegar hasta’l final a nivel llegal” y abrir un contenciosu-alministrativu. “L’argumentación de que nun ye oficial ye inválida”, considera al tiempu que recuerda la propuesta de resolución de la Federación Socialista Asturiana (FSA-PSOE) nel Alderique d’Orientación Política Xeneral últimu, correspondiente al añu llexislativu 2022-2023, na que solicitó que nes próximes oposiciones docentes el B2 y el C1 puntuaren como méritu, lo qu’aprobó la Xunta Xeneral.