Iniciativa pol Asturianu da a Tanxugueiras la distinción de 'Embaxadores de la Llingua Asturiana'

Les pandereteres gallegues tocaron el sábadu na Folixa na Primavera, onde amosaron el so sofitu a la oficialidá dende l'escenariu.

Representantes d'Iniciativa pol Asturianu tuvieron en Mieres pa entregar a Tanxugueiras la distinción de 'Embaxadores de la Llingua Asturiana'. D'esta forma, Aida Tarrío, Olaia Maneiro y Sabela Maneiro incorporen el so nome a una llista na que tán persones como Eva Cameán, Matthew Stephen Stuckwisch y Juan Carlos García Hoyuelos.

El coleutivu creó esti títulu "pa les persones que, nun siendo asturianes o de territorios del dominiu asturllionés, tienen una trayectoria destacada como activistes en defensa de la llingua asturiana en distintos ámbitos y mui especialmente con iniciatives que permitan al asturianu facese presente n’ámbitos internacionales, ganar reconocencia y espacios de visibilidá". Ye'l casu de les gallegues, qu'emplegaron l'asturianu nel popular cantar ‘Terra’, el favoritu del públicu pa dir a Eurovisión esti añu, y defenderon la oficialidá del idioma en delles intervenciones públiques.

"Tamos mui contentes por esti reconocimientu", espresaron al recibir los diplomes conmemorativos na zona de camerinos Tanxugueiras, que confesaron que cuando taben componiendo "teníesmo claro que l'asturianu yera una llingua que tenía que tar sí o sí en 'Terra'". "Respigámosnos al pensar qu'entovía, a día de güei, l'asturianu nun ye una llingua oficial. Siguíi luchando porque consiguiréislo y taremos toa España arguyoses", añadieron.

Na semeya, Olaia, Aida y Sabela, colos sos diplomes.