La Folixa na Primavera ta de vuelta col so formatu habitual y el reclamu de Tanxugueiras

Llueu del confinamientu y el ‘Ensin Folixa na Primavera’ del añu pasáu, con eventos con aforu llendáu, torna la Folixa na Primavera esta fin de selmana col so formatu habitual. Mieres va contar cola preba de sidra y actuaciones musicales nel Parque Xovellanos, ente les que rescamplen les gallegues Tanxugueiras, grupu que ta recibiendo esti 2022 les llamaes de los principales festivales pop del Estáu.

Torna la primavera coincidiendo con un momentu menos duru de la pandemia y los mierenses recuperen la so folixa nestes feches. La Folixa na Primavera entama esta tarde a les 20.30 hores cola llectura del pregón por Loli Olavarrieta, presidenta de la Xunión de Comerciantes, y la entrega del XX Distintivu a la Investigación Folclórica ‘Fini Suárez’, que nesta ocasión va ser pal concursu ‘Indumentaria’ que se celebra en Grau xunto col Día’l Traxe’l País.

Los participantes nel cursu d’echadores de sidra tamién van recibir los diplomes enantes de principiar, a les 21.30 hores, cola música, que va correr cargu esta primer xornada de L’Artusu, Ruxidera, Prau Llerón y la Banda de Gaites de Mieres, acompañaos de La Bonturné y Vulgar Lengua. No que respeuta a la sidra, el so repartu va principiar enantes, a les 19 hores, cola escanciada, pa siguir a les 21 cola de pipa.

La presencia de otres variedaes de sidra más allá de la de tonel, como la de vermú o la de xelu, ye una de les principales novedaes d’esta edición de la Folixa na Primavera, con una fusión xunto con quesos asturianos el sábadu a les 19.30 hores en Mieres Centru Cultural, con un preciu de 7 euros. En total, nos trés díes, van regalase unos 3.000 llitros de la nuesa bébora nacional, tanto en pipa como escanciada.

Xunto con Fruela 757

El sábadu’l repartu va facese de 13 a 15 y de 19 a 21 hores, escanciada, y de 21 a pieslle, de pipa, que’l domingu va ser de 13 a 15 hores. L’actividá, sicasí, va entamar al meudía con La Folixina, empobinada pa la reciella.

A la mesma hora, Rubén Bada va poner nel Auditoriu Teodoro Cuesta una clase maxistral sobre ‘La música tradicional asturiana, averamientu y recursos prácticos instrumentales’. A les 13 hores va haber un pasucais de la Banda de Música de Mieres y de Banda Sinfónica Atenéu Musical, mentes qu’a les 14 hores van tomar el relevu los grupos de baille L’Artusu, Ruxidera y Prau Llerón.

Yá de tarde, a les 19 hores, estes formaciones van participar nuna ‘Tarde en Danza’ acompañaes de la Bandina’l Busgosu, la Bandina Los Indianos y Cantaruxare. La música va siguir con Fruela 757 a les 21 hores nel Parque Xovellanos con un set en direuto pa calecer l’ambiente de cara a l’actuación principal de la Folixa na Primavera, prevista pa les 22 hores.

Trátase de la presencia de Tanxugueiras, Olaia Maneiro, Aida Tarrío y Sabela Maneiro, que tán causando sensación na escena musical estatal. La so participación nel Benidorm Fest, nel que se decidía’l representante de RTVE n’Eurovisión, col cantar en gallegu ‘Terra’ –nel qu’incorporaben la frase n’asturianu ‘nun hai fronteres’ xunto cola mesma n’eusquera, catalán y castellanu– dio a esti tríu de pandereteres una gran popularidá, ganando inclusive na votación del públicu.

El so nome agora pue vese nos cartelos de los principales festivales del Estáu, tanto los centraos na música de raigañu celta como los más pop, dando asina una gran visibilidá a la cultura gallega gracies a la so propuesta qu’axunta tradición y modernidá. En Mieres van ufrir l’espectáculu que vienen presentando cola so xira ‘Midas’.

Asturianaes y cantares de chigre

El domingu, xornada final de la Folixa na Primavera, va arrancar a les 12.30 hores con asturianaes y cantares de chigres. Darréu, a les 13.30 hores, van tocar na plaza de la Casa Conceyu Calea y Baxel nun vermú postfolk.

Los cantares de chigre van siguir a les 14.15 hores n’El Requexu y en Jerónimo Ibrán, mentes que la última actividá de la fiesta va ser una ‘clownfolixa’ a les 18 hores nel Auditoriu Teodoro Cuesta.