“Hai munches persones detrás d’esti reconocimientu”, asegura García Arias

Esti vienres, Día d’Asturies, el Gobiernu entrega les medayes del país. Ente los merecedores d’esti honor ta Xosé Lluis García Arias, primer presidente de l’Academia de la Llingua Asturiana y una figura clave nel estudiu, normativización y difusión del asturianu, qu’apunta que “pongo la cara, pero hai munches persones detrás d’esti reconocimientu”.

La primer respuesta al atender a Asturies.com na xornada previa al actu que va tener llugar mañana a les 18.30 hores nel Auditoriu d’Uviéu dexa bien claro’l sentir del filólogu sobre’l calter coleutivu d’esti gallardón: “Toi tranquilu, aguardando que sía un bon resultáu pa lo que tamos defendiendo”. Porque’l reconocimientu que supón esta medaya del país entiéndelu non sólo como’l premiu al llabor individual d’una persona, sinón al de muncha xente que puxó estes décades por una forma de sentir y entender Asturies.

“Merez la pena tar ehí”, sigue García Arias, que siente representar “a un sector de la sociedá asturiana que ye favoratible a la oficialidá; a muncha xente que trabaya pola llingua asturiana y por una realidá social y política; que tien una creencia d’Asturies como pueblu y como elementu importante dientro de la nuesa organización política”. “Evidentemente pongo la cara, pero hai munches persones detrás d’esti reconocimientu”, añade.

Mañana, depués de recibir la medalla, tendrá un tiempu breve, 2 o 3 minutos, pa dar agradecimientos y un pequeñu discursu. Xunto a él van ser distinguíos l’oftalmólogu Luis Fernández-Vega; la primer muyer en presidir la Xunta Xeneral, d’Izquierda Xunida, Laura González; la periodista y escritora candasina María Teresa Álvarez; y el cocineru José Andrés.

Amás van ser declaraos fíes y fíos predileutos Ángeles Flórez Peón ‘Maricuela’, histórica militante socialista de más de 100 años d’edá; l’empresariu asturmexicanu Antonio Suárez Gutiérrez, cabeza visible del holding Grupo Marítimo Industrial (Grupo Mar); y, a títulu póstumu, el rector Leopoldo Alas Argüelles, fusiláu nel 1937 poles tropes franquistes n’Uviéu. El popular periodista Juan Ramón Lucas, nacíu en Madrid nel 1958, de padre y madre asturianos, va recibir mentes el títulu de fíu adoptivu.